4372/2024-2025

Lunglei, 2025 Ramtuk thla ni 21: Vawiin khan Nasha Mukt Bharat Abhiyaan, Lunglei District hma lakna hnuaia ruihhlo hman sual venna tura zirtirtu turte tan ni khat awh training, 'One day Training of the Trainers (TOT) Programme on Drug Abuse Prevention for Master Volunteers and Nodal Teachers' chu Education Conference Hall, Education Complex, Lungleiah buatsaih a ni.

He hun hi Lunglei District Social Welfare & Tribal Affairs Officer Pu C. L. Joseph chuan khuallian nia hmanpuiin, Nasha Mukt Bharat Abhiyaan (NMBA) hma lakna a sawi fiah a. Kum 2020 khan Aizawl, Champhai leh Kolasib-ah NMBA hi kalpui ṭan a nih thu leh kum 2022-ah khan Lawngtlai, Mamit leh Lungleiah te kalpui leh a nih thu te, kum 2023-ah chuan Mizoram district zawng zawngah deputy commissioner-te kaihhruaina hnuaiah ṭha tak leh chak taka kalpui chhoh zel a nih thu a sawi a. Sikul hrang hrang aṭanga zirlai (master volunteer)-te leh zirtirtu (nodal teacher)-te chu sawrkarin ruihhlo dona kawnga hma a laknaah theih tawp chhuah tur leh training buatsaih chu chhawr ṭangkai tum ṭheuh turin a chah a ni.

Training-ah hian Mizoram sawrkar Social Welfare & Tribal Affairs Directorate hnuaia Mizoram Social Defence and Rehabilitation Board aṭanga resource person pahnih - Pi Vanlalhruaii leh Pu Lalrindika te'n zirtirna an pe a ni.