4371/2024-2025

Dated Hnahthial, the 21st February, 2025: Vawiin chawhma dar 11:00 khan Mizo Upa Pawl (MUP), Hnahthial Sub Headquarters chuan Horeb Lodge Conference Hall-ah General Conference Vawi 3-na an hmang a. He hun hi Pu Zothanmawia Khiangte, Addl. DC, Hnahthial chuan khuallian niin a hmanpui a ni.

Pu F. Aithuama, MUP Vice President kaihhruaiin hun hi hman a ni a. Khuallian, Pu Zothanmawia Khiangte, Addl. DC chuan kum lamah pawh upa, zawiawi zawk tura ngaih ten hun bitukah programme an tan thei chu lawmawm a tih thu leh entawntlak a tih thu a sawi a. Hnahthial atanga sawn a nih dawn avangin tun bak thusawina hun tha a neih a rin tawh loh thu leh Hnahthial District chu Mizo hlang awmna, inkalpawhna pawh tha tak vek a nih avangin nuam a tih thu a sawi. Upa te chu an tawn hriat a tam tawh avangin ram leh khawtlang tan an hlu tak zet a, naupang zawkte pawhin zah takin kan en thin tur a ni tiin tun laiah thalaite khawvel ti thin mah ila, a nihna takah chuan upa te khawvel hi a la ni zawk mah lo maw a tih theih a ni a ti.

Addl. DC chuan Upate hi khawvel hian a ngaih pawimawh thu sawiin UNO pawhin an pualin dan a siam hial thu a sawi a. Tuna kan sorkar hrawn mek pawhin upate ngai pawimawhin an pension lak thin pawh nasa takin a tipung a ni a ti a. Upa kalkhawmte chu an vanneihna lam thlir thiam tura chah in, kan rilru hian kan taksa hi a kaihruai nasa hle a ni a ti a. Kan rilru put hmang a tha zawnga kan kaihhruai phawt chuan kan taksa pawhin a zawm mai thin thu sawiin chu chu Pathian duhdan a nih thu pawh a sawi a ni. An hriselna ngai pawimawh a, doctor rawn hreh lo tura chahin Upa te chu kan ram, district leh khawtlang rohlu an nih avangin society-ah inthlahrung lova, an phak ang zelin theih tawp chhuah thin turin a chah bawk a ni.

He hunah hian Rev. Lalawmpuia, PCI, Hnahthial Bialtu chuan hunserh hmangin member kal tate sunna hun hman a ni a. Prsident kal chhuak tur Pu Kawlhmingliana'n thu a sawi bakah zaithiam ten zaiin kalkhawmte an awi a ni. Mizo Upa Pawl (MUP) Sub Headquarters, Hnahthial hnuaiah Unit sawmhnih pariat (28) an awm a, member sang hnih za sarih sawmruk (2,760) vel an awm bawk a ni.