Nu in a fa hmasa ber a pai atanga a hrin hnu, hnathawk thei lova a awm chhunga mamawh a tlakchham lohna tur leh nau chunga thihna leh nau chhiat a tlem zawk theihna tura Rs.5,000/- a tanpuina tur Sawrkar Laipuiin a duan Pradhan Mantri Matru Vandana Yojana (PMMVY) chu Khawzawl Circle huamchhungah hmeichhia 495 in an dawng tawh a, heng miten tanpuina an dawn hi a vaiin Rs.24,75,000/- a ni.

He thu hi vawiin chawhma dar 11:00 a ICDS Khawzawl Project in PMMVY chungchanga Village Council aiawhte leh tlawmngai pawl hrang hrang aiawhte nena inkawmhona, BRC Training Hall, Khawzawl a neihah tarlan a ni a. He hunah hian Pu C. Vanlalzapa, C.O., ICDS Khawzawl Project chuan PMMVY chu Sawrkar Laipui Programme pawimawh tak a nih avangin mipuite pawhin kan hmelhriat a, he tanpuina dawng thei tur ten an dawn vek theihna turin kan hriatchian a tul a ni a ti a. ICDS Staff te leh Anganwadi Workers te chuan a dawng thei turten an dawn ngei theihna turin theih tawpin hma an la tih sawiin amaherawh chu chhan engemaw vanga ICDS a thawktute leh Anganwadi Workers te hnena in Report lo leh in Report hreh te an awm ve thei a ni a ti a, chutiang awm palh thei ten tanpuina an dawn theihna turin hmalakpuiah kalkhawmte a sawm a ni.

He hunah hian kalkhawmte chuan PMMVY chu mipuiin an hriatchian zawk theihna turin chanchinbu lamah te chiang zawk a tarlan tul an tih thu te, NGO leh VC hruaituten midangte an hrilhhriat chhawn ve theihna turin Paper buatsaih tha an tih thu te an sawi a, heng rawtna te hi a theih angin an bawhzui dawn tih ICDS hotute chuan an sawi a ni.