4353/2023-2024

Khawzawl, 27th March 2024: Lok Sabha Inthlanpui 2024 neih tura inpuahchahna kal zelah vawiin khan Govt. Khawzawl High School, Zuchhip Veng-ah 22-Tuichang Assembly Segment-a duty tur Polling Official (Presiding Officer, Asst. Presiding Officer leh Polling Officer) te tan Training tumkhatna buatsaih a ni a. Khawzawl Bawrhsap, District Election Officer ni bawk Pu K.Lalrohlua leh Addl. DC, Deputy DEO ni bawk Pu Lalfakzuala te uapna hnuaiah training hi neih a ni.

Training tan a nih hma hian Bawrhsap Pu K. Lalrohlua, Addl DC Pu Lalfakzuala leh Pi V. Lalmuanpuii, Project Director, DRDO te chuan Polling Official-te hmaah hian thu kamkeuna an sawi a, training tura kalkhawmte hriat tur thu pawimawh hrang hrang te an hrilhfiah a ni. DEO Pu K. Lalrohlua chuan inthlan hlawhtling taka buatsaih turin thawhhona leh tanrualna tha a pawimawh thu sawiin, mitinin an mawhphurhna theuh an hlen mai piah lamah an thawhpuite nen an inpuihtawn that a tul a ni, a ti. Bawrhsap hian Polling Official kalkhawmte chu uluk taka ngaithla a, zawhna zawt hreh lo turin a chah a. Dik leh tha taka an mawhphurhna te an hlen chhuah theih nan anmahni tibuai thei ruihtheihthil laka inthiarfihlim turin a chah bawk.

Vawiin Training-ah hian State Level Master Trainer Pi V. Lalmuanpuii, Project Director, DRDO; Pu Vabeimozachhi Chozah, SDO (S); Pu Timothy R. Lalhmangaiha, Election Officer; District Level Master Trainer – Pu Elijah LH Sanga, SDC; Assembly Level Master Trainer Pi PC Lalhmingtluangi, Asst Professor, GKZC ten Polling Official te hi zirtirna an pe a. Vawiin training-ah hian thupui hrang hrang – Election Duty Certificate chungchang te, Polling Station enkawl dan tur te, Inthlan kaihhnawih bungrua dah fel dan tur te, Form hrang hrang fill up dan te bakah EVM leh VVPAT enkawl leh rem dan tur inzirtirna te neih a ni.

Polling Official te pual hian training vawi hnih la buatsaih leh tur a ni a, April ni 12 leh April ni 17-ah hian a hmun ngaiah Training hi neih leh a ni ang.