1557/2026-2027 

Dated Khawzawl, the 29th July, 2026 : Vawiin khan MSACS, DAPCC leh NACO tangkawp huaihawt District Level Red Ribbon School Quiz Competition chu Zaingen YMA Hall, Khawzawlah neih a ni a. Khawzawl Bawrhsap Pu K. Vanlalthiana, DAPCC Chairman ni bawk chuan he program hi a hmanpui a, Sub-Headquarter YMA President Pu PC Rosiama chuan hun a kaihruai a ni.

Bawrhsap Pu K. Vanlalthiana chuan he hunah hian thu sawiin Quiz Competition kaltlang hian zirlaiten HIV/AIDS leh a kaihhnawih natna dang chungchanga hriatna zau zawk an neih a duh thu a sawi a. Kalkhawm zirlaite chu HIV leh ruihhlo do kawngah tan la tura sawmin, nakin zela khawtlang leh ram tan hmasawnna thlentu an nih theih nan an nun uluk tura fuihin, duhsakna a hlan bawk a ni.

Chief Medical Officer (CMO) Dr. Shahnaz M. Zothanzami chuan Red Ribbon Quiz thiltum sawifiahna hun neiin, HIV leh a kaihhnawih Sexually Transmitted Infection (STI) natna hrang hrang kai theih dan leh inven dante a sawi a. Mizoram chu India state hrang hrang zingah mihring kum 15-49 inkar cheng zat za zelah HIV vei awm zat (prevalence) tamna ber a nih thu tarlangin, Khawzawl district-ah HIV vei mi 600 vel bawr an awm thu a tarlang bawk a. Kan ram dinhmun a that loh avangin zirlaite hnenah heng natna chungchang zirtirna pek a pawimawh thu a sawi a. HIV veite chu an dinhmun an inhriat hmaa, midang hnena hrik kaichhawng lo tura ART tha taka an lak a pawimawh thu a sawi bawk a. Family Guidance and Counselling Centre-a Counsellor Rev. Lalbiaksanga Pachuau pawhin HIV/AIDS awareness hun a hmang a, kalkhawm zirlaite chu HIV laka an fihlim theih nan an nun fimkhur taka hmang turin a chah a ni.

He Quiz Competition atan hian Khawzawl district chu zone 5-a then niin, zone tin inelnaa a titha ber school pahnih zel thlan chhuahte chu vawiinah an inel a. School 10 atangin zirlai 2 theuhin intihsiakna hi an bei a, hetiang hi result a ni:
1st - Khawzawl Senior Secondary School (Samagra Shiksha)
2nd – Govt. Model High School
3rd - Govt. High School, Khawzawl
Consolation: Govt. Middle School, Chhawrtui
Vawiin Quiz Competition-a pakhatna hian State Level Red Ribbon Quiz Competition August thlaa Aizawla neih turah Khawzawl District aiawhin an tel dawn a ni.