1558/2026-2027

Dated Aizawl, the 29th July 2026 : Vawiin khan School Education Directorate Conference Hall-ah Akhil Bhartiya Shiksha Samagam (ABSS) leh National Education Policy 2020 kum 6  champhaphak lawmna pualin hun hman a ni a, School Education Minister Dr Vanlalthlana'n a hmanpui. 

School Education Minister Dr Vanlalthlana chuan he hunah hian thusawiin sorkarin zirna siamțhatna kawngah School țha tehna siam a nih dawn thu leh School Assessment Board  din a nih dawn thu a sawi a, Skill Development-ah MBSE chu Awarding Body an nih theih nan an nawr mek thu te,  Zirtirtu transfer & posting chu online a kalpui a nih tur thu te a sawi. Mizoram sorkarin Engineering College-a class neih thuai a nih theih nan hmalak a nih thu leh nakum ațanga class țan tum a nih thu te,  NIT Lengpui tihhlawhtlin nan sorkarin  theihtawp a chhuah thu a sawi a.  NIT Lengpui chu NIT dang ai pawha campus nei țha a nih thu te, Mizoram sorkarin forest clearance atan cheng vaibelchhe 10 an pek thu leh hei hian NIT hotute a tihlawm thu a sawi a, theihtawp chhuah an tum a ni, a ti.

Mizoram Education Reforms Committee Working Chairman Prof Lalbiakdiki Hnamte pawhin thusawiin  NEP tihhlawhtlinna tur kawnga harsatna awm hrang hrangte  a sawi a. Kan Exam kalpui dan kalphung siamțhat a țul thu te leh zir dan phung siamțhat a tul thu te a sawi a.  Technology hmanrua chi hrang hrang sorkarin a sem țhin chu hman țangkai a țul thu a sawi a. NEP 2020 rawtna țha tak tak te chu tuna Mizoram zirna kalphung en hian tihhlawhtlin harsa tak tak a awm thu te, School stage-ah mai bakah College leh University ah te pawh a tak takah chuan kan zirna ruangam neih mekah tihhlawhtlin mai theih loh te a awm thu a sawi. 

NEP 2020 kum 6 cham puala hun hmanah hian Commissioner & Secretary Higher & Technical Education Dr Lalrozama chuan inlawmna thu a sawi a, Director Pi Angela Zothanpuii chuan lawmthu a sawi. Joint Director Higher & Technical Education Prof Benjamin Lalrinsanga , Director SCERT Pi Dorothy Zoramthangi, Secretary MBSE Pi Sarah Lalengzami Pachuau, State Project Director Pu C.Lalthanzira, Samagra Shiksha te pawhin thu an sawi a, panel duscussion neih zui a ni bawk.

He hunah hian Mizoram Education Reforms Committee member te, School Education Department Director leh Officer te, Higher & Technical Education Director leh Officer te, MBSE Chairman leh Officer te, SCERT Director leh Officer te, Samagra Shiksha SPD leh Officer te, College leh Higher Secondary School Principal te, Zirtirtu Association hruaitute leh tlawmngai pawl hruaitute an tel a ni