871/2023-2024

Khawzawl, the 21st June, 2023: Samagra Shiksha Khawzawl District bultumin vawiin chawhma dar 11:00 khan Remna Ni lo thleng tur pualin District Level Inter High School Quiz Competition - 2023 chu Zaingen YMA Hall-ah buatsaih a ni a, thupuiah 'Post Independence 1947 to 1987 Statehood’ tih hman a ni. Quiz Competition-ah hian Khawzawl khawpui chhunga High School 4 atangin aiawh Team 1 theuh an tel a ni.

Quiz Competition hi Pu Lalsikula, DPC, Samagra Shiksha chuan khuallian nia hawngin Remna Ni lo thleng tur puala District Level Inter High School Quiz Competition-a School 4 an tel thei chu lawmawm a tih thu leh hei hian zirlaite tan chona leh hmasawnna a thlen chhoh a beisei tih a sawi a. Quiz Competition-a telte chu State Level-a District aiawh leh tur an ni tih inhria an intihsiakna turah theihtawp chhuah turin a fuih a, duhsakna a hlan nghal a ni.

He Quiz Competition-ah hian PES Khawzawl chu pakhatna an ni a, Govt. High School, Khawzawl chu pahnihna niin Model High School chu pathumna an ni.

Vawiin Quiz Competition hi Pu K. Thantluanga, Dy. DPC, Samagra Shiksha-in a kaihruai a. Pu Lalhmingsangzela, MIS in report a pek bakah Pu Francis Lalruattluanga'n lawmthu sawina neiin programe a khar a ni.