2921/2022-2023

Khawzawl 2nd December, 2022: Vawiin hi khawvel pum huapa Rualbanlote Ni/International Day of Persons with Disabilities a ni a, he ni pual hian chawhma dar 10:30 khan District Project Office, Samagra Shiksha, Khawzawl District bultumin District Education Office kawtah hun hman a ni. He hun hi DEO Pi K.Lalsiamliani, DPC, Samagra Shiksha, Khawzawl District chuan khuallian niin a hmanpui a ni. Rualbanlote Ni hi December ni 3 a hman thin a ni a, kuminah hian Inrinni anih avangin vawiin khan hman a ni ta zawk a ni.

Pu K.Hrangchuailova, RP (CWSN), BRC kaihhruaia Rualbanlote Ni puala hun hmanah khuallian Pi K.Lalsiamliani chuan Khawzawl District puitlinga hlankai anih hnua Rualbanlote Ni hman hmasakna ber a ni tih a sawiin, naupang ngaihsak ngai leh mamawh bik nei te'n hlim takin hmang se an duh thu leh an tan thilpekte an buatsaihsak thu a sawi a. DEO chuan naupangte hi Pathianin theihna bik neiin a siam tih hriat tlan a tul thu leh hnam upa zawk leh hnampui zawkte phei chuan mamawh bik neite hi khawngaih lovin an hmangaih a, an theihna bik hre chhuak turin an enkawl thin a ni, a ti a. Mi nawlpuite aia nasa theihna bik an nei thin a, chungte chu hai chhuah a, hre chhuak a, hmasawntir turin hma an la thin a ni a ti. DEO chuan Mizote pawhin hnampui zawkte hmalak dan entawn tul a tih thu sawiin, keini chuan naupangte kan khawngaih avangin an tana thil harsa tur nia kan hriat chu kan tihtir phal lo thin a, an theihna hre chhuak tur leh Pathianin anmahni thiamna bik a pekte pawh kan khawngaih avangin an hai chhuak thei lo thin a ni, a ti bawk.

Pi K. Lalsiamliani chuan naupang ngaihsak ngai zual leh mamawh bik neite tan sawrkarin zirna inahte ruahmanna tha tak tak a siam a, an dikna chanvo humhalh turin dante a siam a, an mamawh atana hman turin tanpuina fund-te pawh a pe thin a ni, a ti a. Tunhma chuan tanpuina fund lo kal reng reng naupangte hnenah a pawisafaia pek chhuah thin a ni a, tunah chuan Direct Benefit Transfer (DBT) kaltlanga tih a ni vek tawh a, naupang mamawh bik nei report-te pawh an hminga bank account hawnsak a ngai a, an bank account-ah chuan tanpuina fund a lo thlen hunah an thun thin dawn tih a sawi bawk.

Vawiin programme-ah hian zai leh phenglawng tum thlir tur a awm bakah zirlai naupangte atangin special item nei an awm bawk a. He hunah hian Pu Lalchhuanthanga, Co-ordinator, District Project Office, Samagra Shiksha chuan hunserh a hmang a, Assistant Accounts Officer Pi Ramengmawii Sailo chuan zirlai naupang mamawh bik nei, 'children with special needs' 55 te hnenah thilpek a hlan bawk a ni.

Vawiina Rualbanlote Ni puala hun hman hi Khawzawl District-ah District huapa hman vawikhatna a ni a; khawzawl khawpui bikah chuan a remchan dan angin kum 2011 atang khan Block Resource Centre (BRC) bultuma hman thin a ni.