2920/2022-2023

Dated Serchhip, the 2nd December, 2022: Vawiin khan Serchhip District Wildlife Crime Control Sub-Unit-te chu SP Serchhip Office Chamber-ah thukhawmin hmalaak dan tur hrang hrang an sawi ho.

He meeting-ah hian Serchhip District huam chhunga dan lova nungcha kap thinte leh license leh permit nei lova silai leh Airgun kawlte man chhuah kawngah chak zawka hmalak dan tur action plan an siam a ni. Police leh EF&CC department staff te bakah YMA te nen nen Joint patrolling neih a, bazaar leh hmun danga dan kalha ramsa rep zuar an awm leh awm loh te dapa hetiang tite manchhuah an nih theih nan checking kalpui ni se tih an rel bawk a, hei bakah hian a tam thei ang ber nungcha humhalh kawnga inzirtirna pek ni se tiin an rel a ni.

Tunhnaiah Mizoram kaltlanga rampawn atanga nungcha hmanga sumdawnna (exotic wildlife trafficking) hmuh tur awm thin chu pawi an tiin, Serchhip District mipuite hetiang thil a inhnamhnawih lo turin an ngen a. Wildlife trafficking man chhuah reng reng chu danin a sawi anga hrem an nih theih nan hmalak thin ni se tiin an rel. Hei bakah hian Serchhip Mualvawm rama tunhnaia mi thenkhatten thang tam tak kama, he lai rama Vahrit leh Ramar leh nungcha dangte tana harsatna an thlen chu pawi an tih thu sawiin, hetiang titute hi man an nih theih nan hmalak ni se tih an rel bawk.

Serchhip District Wildlife Crime Control Sub-Unit meeting hi Chairman, Pu Stephen Lalrinawma, MPS, SP in a kaihruai a. Member Secretary, Pu Lalbiakchama Chawngthu, DFO Thenzawl bakah, Addl. SP Serchhip, Commandant 42 Bn Assam Rifles, Dy. Commandant 163 Bn BSF, DFO N. Vanlaiphai, Officer in Charge Crime Branch SP Office, Honorary Wildlife Warden Serchhip district, President Serchhip Sub-Hqrs YMA leh President Serchhip Joint Village Council te an tel a ni.