2919/2022-2023

Aizawl 2nd December 2022: Vawiin khan Govt Model Middle School, Darlawn chuan an School tualah Golden Jubilee an lawm a,  School Education Minister Pu Lalchhandama Ralte chuan khuallian niin a hmanpui a.

School Education Minister chuan he hunah hian thusawiin Mizoram hian kawng dangah hmasawn mah ila, zirna lamah hmasawn tel loh chuan awmzia tak tak a nei lo a ti a. Mizoram sorkarin zirna chu ngaih pawimawhah a nei a, zirna lama thawk tur mi 2800 chuang lak an ni tawh a, heng zingah hian a ngheta lak pawh 100 bawr zet an awm a ti. Minister chuan tun hmain zirna sikul hrang hrangah zirtirtu pahnih khat lek lek awmna a tam hle a, tunah erawh chuan sikul tam takah zirtirtu pawh dah belh a ni a, zirna țha zawk sorkarin a chhawpchhuak mek a ni a ti bawk.

Hmar tlangdung hi Zoram kawtchhuah a ni dawn tih a lo aupui țhin chu Manipur nena inkal pawhna kawngpui sial nan central sorkarin cheng vbch 1500 a rawn dah ta a, Bagha panna kawngpui pawh sial a ni dawn a, he tlangdung ațang hian Zoramin châk a la dawn a, a hmawr a eng tawh a ni a ti. Minister chuan zirlai kalkhawmte chu taima taka zira, ding chhuak ngei tur leh khawtlangin a beiseina tihlawhtling turin a chah bawk a ni. Minister hian Jubilee lungphun a hawng a, Golden Jubilee Souvenir a tlangzarh bawk.

Khualzahawm Dr H. Lalthlangliana, Director, School Education pawhin thusawiin he sikulin zirtir chhuah ropui tak tak a nei chu hlu a tih thu a sawi a. Zirna kalpuina kawngah fa duatsual anga sorkar kut nghak vek lovin sikula thawkte leh khawtlang pawhin sikul enkawlnaah tih tur an neih thu a sawi. Director chuan Education hi industry a ni a, hriatna hi pawisa a ni tawh a, hriatna leh thiamna hi sum tam tak hlawhchhuahna a ni tawh a, khawsak awlsam te sum thawhchhuah te duh tan chuan thiamna neih tum tur a ni a ti a. Darlawn model Middle School chu Mizoram tana mi duhawm tak tak chherchhuak zel turin a sawm a. Khualzahawm hian Jubilee lawm nan baloon a chhuah bawk.

Darlawn Govt. Model Middle School hi kum 1972 khan din a ni a, zing sikula bulțan a ni. kum 1974 ah Grant-in-Aid a hlan kai a ni a, kum 1980 ah Deficit a ni a, kum 1991 ah provincialise a ni. He sikul ațang hian mi hlawhtling tak tak Gazetted officer te, rawngbawltu țangkai tak tak Pastor te, Missionary leh sumdawng hlawhtling tak tak an lo chhuak tawh a ni.

Golden Jubilee lawmna hi Pu Lalthanpuia, Headmaster-in a kaihruai a, thusawi bakah zai leh lam te entir a ni a. He sikula lo thawk tawh zawng zawngte hnenah ngaihhlutna thuziak hlan an ni bawk. Golden Jubilee lawmnaah hian he sikula lo thawk țhin te, zir chhuak te, khawtlang hruaitute, Darlawna sorkar mi pawimawh te, tuna thawk mek leh zirlaite an tel a, Jubilee hi ruai nen an lawm a ni.