2918/2022-2023
Aizawl the 2nd December 2022 : Vawiin khan Mizo Academy of Letters Kum Tawp Intawhkhawm 2022 chu Pi Zaii Hall, Synod Conference Centre ah hman a ni a. He huna khuallian Dr. Z.R Thiamsanga MLA, Vice Chairman, Health and Family Welfare Board chuan L. Keivom (L) chu Mizo Academy Award 2022 a hlan a.

He Academy Award 2022 hi L. Keivom fapa David Lalhmingsang, Philippines chuan a dawng.

He huna khuallian Dr. Z.R Thiamsanga MLA Vice Chairman, Health and Family Welfare Board chuan Mizo thu leh hla hi zofate min kuahkhawmtu leh min hnuk hnaitu a nih avangin a pawimawh a, thalaite pawhin nasa leh zuala lehkha kan chhiar a, ziakmi kan ni ve thei lo a nih pawhin thu tha chhiar tam a pawimawh thu te, ziakmite chu hnam changkang a piangin an ngaisangin an duat a, Mizoram ah pawh thu leh hla thiamte kan ngaihsan a, kan chawimawi thiam a tul zia leh MAL hnathawh chu zoram tan a nih zia te a sawi a. Khuallian chuan kan dam rei leh rei loh hi kan kum aiin kan thil tih that leh thu leh hla tha kan ziah leh ziah loh hian a hril a, L. Keivom pawh he khawvelah awm tawh lo mahse, zoram khawvel a awm chhung chuan a thu ziah avangte hian a nung reng dawn a ni tiin a sawi bawk.

MAL Kum Tawp Intawhkhawm Prof. R.L Thanmawia MAL President kaihhruaiah hian Dr. Zoramdinthara Secretary, MAL chuan roport pe a.

Dr. H. Laldinmawia'n L. Keivom chanchin chhiarin MAL sum dinhmun ngaihthlak a ni bawk. He hunah hian Academy Award lo dawng tawh te, ziakmi, MAL Member leh affiliated club member Aizawl khaw pawn leh Myanmar atang tein palai an kal khawm a. Academy Award hi ziakmi sawm leh pathumin an lo dawng tawh a ni.