2917/2022-2023
Aizawl the 2nd December 2022 : Vawiin khan Pu K Laldawngliana bialtu MLA & Vice Chairman C& IDB chuan Mualkhang Golden Jubilee Khuallian niin a hmanpui Golden Jubilee Committee, V/C, YMA, MHIP, MUP, hruaitu ten MLA hi an tawiawm a ni.

Mipui lokal khawm te hma ah MLA Pu Dawngtea chuan thusawiin "In zavaiin chibai ka buk a che u. Vawiinah hian ka bial chhung Mualkhang khuain Golden Jubilee kan thleng hi ka lawm a, he Golden Jubilee hi hlim leh lawm takin hmang ila ka duh a ni. Golden Jubilee Souvenir kan tlangzarh (release) tak pawh a chhiartu te tan bengvarna tha tak a pek ngei che u ka duhsak che u a ni. Mualkhang khua hian Golden Jubilee thleng turin hun hlimawm leh harsatna chi hrang hrang in tawk ngei tawh ang a, heng hun chi hrang hrang in tawh hian tawrh chhelna te, taimakna te a pek ngei che u ka ring nghet tlat a ni. Mualkhang hi tum thum luah luhna tur a lo ni reng tawh mai a, he khua luah luh hmasak 1897 khan a luah hmasatu ten harsatna tawkin mipa nau piang an thih zel avangin rauhsan a ni ta a. Chumi hnuah Sentlang lal phalnain Pu Tawnhlelha Ralte hovin kum 1942 velah luah luh leh niin Sentlang lalin rorel turin a upa min Pu R. Dengchhunga a ruat a, lal nihna pe hman lovin lal banin a chhunzawm ta a, rambuaiin rawn nangin 1967-ah Lungdai khuaah sawikhawm niin mahni khua a kir Sorkarin a phal hnuah kum 1972-ah luah luh leh niin vawiin thlengin meimit lovin Golden Jubilee kan lo thleng leh thei ta hi a lawmawm in a ropui hle in ka hria a ni" a ti.

A sawizelnaah Pu Dawngtea chuan "Golden Jubilee kan thlen hian he khaw din leh tu te, Khawtlang hruaitu, khawtlang tana mi tangkai tam tak, V/C, YMA, MHIHP, MUP hruaitu he hun nghakhlel tak tak chatuan ram pan ta te pawh kan hre reng a ni. Golden Jubilee hmangtu mipui ten Mualkhang khawtlang tan theih tawp chhuah ila, kan khawtlang tan tan la ila, zu, ruihhlo, mi awm khaw lo te an awm lohna hmun ni thei turin theihtawp kan chhuah a tul takzet a ni. Tun dinhmunah kan ram hi a damlo nia ngaih theih turin zu leh ruihhlo a hluar a, HIV/AIDS vei an tam a, India ramah population atanga teh a, HIV/AIDS vei tam ber te zing a mi kan ni ta te hi a lawmawm loh hle mai chuvangin kan nun kan uluk pawh a tul hle a ni" a ti bawk. Pu K. Laldawngliana chuan "Golden Jubilee kan hman mekah hian kan rilruah awm tel se ka duh chu ramngaw, thing leh mau leh nungcha te humhalhna kawngah hian tan la ila ka duh hle bawk a ni. Kan sik leh sa dinhmun ngaihtuah ila khaw lum ta lutuk te hi ramngaw, thing leh mau kan suat nasat lutuk vang a ni a. Ruah sur hun bi awm mumal lo ta lutuk te hi a tuartu chu keimahni tho kan ni a. Tui hna kang chat mek pawh hi ramngaw, thing leh mau a chereu nasat vang a ni. Chuvangin nungcha, ramngaw, thing leh mau te kan humhalhna kawngah tan kan lak pawh a tul viau tawh a ni. Thing phun uar ila kan ramngaw chereu mek humhalh hi kan tihtur pawimawh tak a ni." a ti

Muakhang Br YMA te hi bialtu MLA hian Combo Speaker tha tak a hlan bawk a ni.