21/2026-2027

Dated Khawzawl, 2nd April, 2026: Vawiin chawhnu dar 1:00 khan Krishi Vigyan Kendra (KVK) Khawzawlah, Khawzawl District Drug Disposal Committee te bultumin September 2025 atanga February 2026 chhunga ruihhlo man te halralna hun hman a ni a, Bawrhsap Pu K. Vanlalthiana’n a hmanpui.

Bawrhsap, Pu K. Vanlalthiana chuan Ruihhlo heti zat man a ni chu lungchhiatthlak a tih rualin a manna kawnga thawktu, SP leh a thawhpuite thawhrimna leh thahnemngaihnaah lawmawm a tih thu a sawi a. Ruihhlo tawlha thalai suattute lakah Khawzawl District chu a zaidawh dawn loh thu sawiin, dan ang taka an chunga na taka action lak a nih tur thu a sawi a, District chhungah hetiang hi a thlen tawhloh nan a zuartu leh lo tawlh thin te pawhin sim a bansan ngei tura a duh thu a sawi. NGO te leh Ruihhlo dona kawnga hmalatu pawl hrang hrang te chu Police te nena thahnemngai taka ruihhlo tawlh ru leh zuarte zawnchhuah kawngah thawk ho zel turin a sawm bawk a ni.

Ruihhlo halralna hun hi Pu Jeremia Vanlalhmachhuana, SDPO Khawzawl-in a kaihruai a. Pu F. Lalbiakzauva, SP Khawzawl chuan inlawmna thu sawiin, Pu Jerry Lalrinsanga, DSP Hqrs Khawzawl atangin report ngaihthlak a ni a, NGO aiawh atangin thusawi ngaihthlak a ni bawk. He hunah hian Pu Chandrakant Bagoria, SDO (Sadar) bakah District level Drug Disposal Committee te, NCORD member te, Khawzawl Police leh Excise Department-te, NGOs te leh sawm bikte an tel a ni.

Drugs halral te hi Methamphetamine 20.743 kg, ₹119,915,000/- man hu te, Heroin (No 4) 582 grams, ₹11,419,000/- man hu leh Ganja 1.868kgs, ₹9340/- man hu te a ni a. Hemi kaihhnawih ah hian Khawzawl Police Station-ah case 9 ziah luh niin mi 17 man an ni. Vawiin a Drugs halral zawng zawng hi avaiin ₹131,343,340/-man hu a ni.

Nikum 2025 khan Khawzawl PS ah ND & PS case 12 ziahluh niin, Methamphetamine hi 11.612, kgs, ₹15,095,600/- man hu te, Heroin 747 grams, ₹8,480,000/- man hu leh Ganja 5.879 Kgs, ₹29,395/- man hu te man a ni a, case kaihhnawihah hian mi 15 man an ni. Tichuan, kum 2025 chhung a ND & PS case hnuaia ruihhlo man zawng zawng hi avaiin ₹23,604,995/- man hu a ni.

Kumin 2026 January atanga vawiin ni thleng hian ND & PS Case hnuaiah thubuai 5 ziahluh a ni tawh a Methamphetamine 13.873kgs, ₹110,960,000/-man hu Ich Heroin (No 4) 225 grams, ₹4,500,000/- man hu te man a ni a, Case kaihhnawih ah hian mi 10 man an ni. Kumin 2026 a Ruihhlo man zawng zawng chu avaiin ₹115,460,000/- man hu a ni.

Khawzawl District ah hian theihtawp a ruihhlo do niin, District Police te leh Excise & Narcotics Dept. bakah NCORD hmalakna in Supply, Demand leh Harm reduction lamah theihtawp chhuah a hmalak mek zel a ni.