3169/2024-2025

Khawzawl, dated 25th November 2024: Vawiin chawhma dar 11:00 a.m khan DC Meeting Hall-ah naupang chhawmdawlna leh tanpuina dawng turte thlang tura din, Sponsorship and Foster Care Approval Committee (SFCAC) chu an thukhawm a, Khawzawl DC leh SFCAC Chairman ni bawk, Pu K. Vanlalthiana'n hun hi a kaihruai a ni.

He hunah hian District Child Protection Officer leh SFCAC Member Secretary ni bawk, Pi Lalsiammawii chuan SFCAC din chhan sawifiahin, Mission Vatsalya hnuaia sponsorship and foster care (chhawmdawlna) pek theih a nih dante kalkhawmte hnenah a sawi a, vawiina SFCAC thutkhawm koh a nih chhan pawh he Mission Vatsalya hnuai a sponsorship dawng tur naupang thlan a ni, a ti. Sponsorship pek theih dan hrang hrangte sawiin he sponsorship hnuaiah hian naupang nu leh pa nei lo te, natna khirh vei te leh naupang dinhmun hrang hrang a zirin he sponsorship hi pek theih a ni a, SFCAC hian heng naupang sponsorship dawng thei tur a hming thehluhte hi uluk taka enfiahin, sponsorship dawng awm an ni reng em tih uluk tak a thlir ho leh tur a ni a, sponsorship an dawnte an hman chhunzawm zel dan te leh an mamawhna ang takin a dawngtuten an hmang ngei em tih enfiah a ni bawk dawn tih meeting-ah hian a sawi a ni.

Hemi hnu hian committee chuan sponsorship pek atana rawtna te enin a naupang te dinhmun ngaihtuah chungin pek turte thlan a ni a, endik a chhui chhunzawm zel tur a tih a ni bawk. Chairman Pu K. Vanlalthiana chuan hetiang naupang tanpuina pek nana hetiang ruahmanna awm hi lawmawm a ti a, a dawng tur te'n an hlawk pui ngei a beisei thu a sawi bawk a ni.

He hunah hian Addl. DC, Pu Lalfakzuala; SDO (Sadar), Pu Suvigya S. Chandra, IAS; Child Welfare Committee Chairman; MHIP Sub-Headquarters President; leh PO (NIC), DCPU te an tel a ni.