No.7590/2020-2021
Vawiin chawhma dar 10:00 khan Zaingen YMA Hall, Khawzawlah Mizoramin State puitling a nih champha vawi 34-na State Day, 2021 lawmna hun hman a ni. He hun hi Pu Zothanmawia, Deputy Commissioner, Khawzawl District chuan Khuallian niin a hmanpui a, kalkhawmte chu an hnathawh ngaipawimawha, hriatreng tlak leh midang tihhmuh tlak thiltha hnutchhiah turin a fuih.

Pu Lalrohlua, Additional Deputy Commissioner, Khawzawl District kaihhruai programme-ah hian Pu Zothanmawia chuan kalkhawmte  State Day chibai a buk a. Kum 1987 a State puitlinga hlankai a nih hnuah Mizoram chuan nasa takin hma a sawn tih sawiin, zirna, lirthei, in leh lo, information technology-ahte hmasawnna a langsar zual a ni, a ti a. India ram chhung hmun dang leh ram pawn thlengin  kan inzarpharha, mithiam lo chhuak thar tam zelin inelna sang zawk a hringchhuaka, chu chuan changkanna leh ram hmasawnna a thlen zel a ni a ti.

Bawrhsap chuan Khawzawl District chhung hmun hrang hrangah inkalpawhna kawngpui laih leh siamthat mek a ni a, zawh fel a nih hunah chuan mipuite tan a chhawrnahawm hle dawn a ni, a ti a. Vankal khuaa 20 MW pechhuak thei Solar Power Plant bun mek pawh tluang taka kalpui a nih thu a sawi a.
Pu Zothanmawia chuan sawrkar hnathawkte chu an hna ngaipawhmawh tura fuihin, Sawrkar atanga hnathawhna tur pawisa lo kalte pawh a nihna tur anga hun tiam chhung ngeia tangkai taka hmang turin a chah a. State Day lawm tura kalkhawmte hnenah Mizoram hmasawnna hrang hrang a taka chentu kan nih thu sawiin, a kal zelna turah pawh mimal tin te'n dinhmun pawimawh tak kan chelha, tangkai taka mahni awmna hmunah theuh thawk zel tur kan nih thu a sawi bawk.

Dr. Saithangpuia, Block Development Officer, Khawzawl RD Block chuan State Day hman chhan leh pawimawhna sawiin, politics, sakhuana, eizawnna kawngahte mahni a ro inrel tak tak turin State puitling nih a pawimawh hle tih a sawi a. State dinhmun chu harsa taka sualchhuah niin, India danpui Article 371 G hnuaiah kan hnam nihphungte humhalh turin a bika hunghranna special provision pawimawh tak kan neih theih phah a ni, a ti bawk.

Khawzawla State Day lawmna programme-ah hian Khawzawl chhunga Head of Office-te, MJA, Joint VC, YMA, MHIP, MUP leh political party aiawhte an tel a.  Captain John Zonunmawia, Commanding Officer, Khawzawl CO Bialin hunserh hmangin Pu R. Lalrintluanga, Principal, Govt. Khawzawl College-in lawmthu a sawi a.
Zaithiamten kalkhawmte awiin, 2nd IR Battalion pipe band-in National Anthem an tum bawk a ni.