Vawiin khan Dr. R. Lalthangliana, Minister, Health & Family Welfare Department, Higher & Technical Education, Commerce & Industries chuan Mobile Medical Van, Essential Drugs & Diagnostic Kits & Laptops and Speaker Mamit District Hospital, PHC/CHC leh Sub- Centre-a hman tur vailiam.

Khuallian Dr. R Lalthangliana chuan Mamit District chhunga cheng te'n hriselna kawnga hma an sawn theihna tura hmanraw tangkai tak taka thuam an ni chu a lawmawm thusawiin District - 11 zinga Medical Doctor ngei District Bawrhsap, hriselna kawnga a ngaihna hria in nei chu in vannei takzet a. Aspirational District atangin Mizoram District 11- te zingah pakhatna ni thei tura tan la tura chahin in tum tlat chuan theihloh a awm lo a ni tiin kum zabi 21-a hmasawnna chu hmang tangkaiin dik taka kan hmachhawn chuan District hnufual ber thin kha a ropui ber kan ni thei a ni a ti. 

Dr. Thangtea chuan Pathian ringtu mizo nih hi a nuama, pi leh pute atanga lungrual tak leh inpumkhatna nena thawkho thin kan nihna chuan rah tha chhuah zelin, Covid - 19 avanga nunna chan kan nei erawh pawi hle rualin hri dona kawnga kan hmalakna-a hlawhtlinna kan hmuh mekte leh India hmarchhak State pariat (8) zingah Covid - 19 vanga thi tlemna ber State kan ni chu Pathian avang leh kan thawhhona avang a ni a ti. Minister chuan hmasawnna kan hmuh mekte chu chho zawnga thlira in delhbeh tir mai lovin hmasawnna tluantling nei turin kan tih ve theih tawk theuha tan la thar turin kalkhawmte a fuih a. Kawngpui tha nei turin hmalakna kalpui mek niin khawchhak lam atanga khawthlang lam hawiin kawngsial hna thawh tan mek a nih thu a sawi bawk. 

Er. H. Lalzirliana, Bialtu MLA pawhin Mamit District-in hriselna kawnga hma kan sawn theihna tur leh Aspirational District kan nihna atanga khaichhuah kan nihna tura CSR hnuai atanga hmanraw tangkai tak tak lei a ni chu lawmawm a tih thusawiin Kan District Bawrhsap-in hemi kawnga hma a lakna chu fakawm a tih thu a sawi a. Covid-19 hripuiin khawvel a tih buai mek karah Mizoram chu Sorkar hmalakna chak tak a vang te, Kohhran mite tawngtaina vang te leh khawtlang hruaitute hmalakna avangin India ram state zingah a titha ber pawl kan ni chu lawmawm a tih thu a sawi bawk.

Bialtu MLA chuan Mamit District-in kawngpui tha kan neih chu Mizoram Sawrkarin a ngaihpawimawh berte zing a mi a nih avangin chak taka hmalakna kalpui a ni a, hun reilote-ah kawngpui tha kan nei thuai a beisei thu a sawi. 

Mamit District-in hriselna lama hma kan sawna, nu naupai te'n enkawlna tha zawk an dawn a, damdawi an mamawh angte an hmuh theihna tur bakah damlote enkawlna tha zawk leh rang zawk pek an nih theihna tura District chhung PHC/CHC leh Health Sub- Centre-te tana hmanraw lei hi Mamit District Bawrhsap hmalakna-in REC LTD, CSR Health Project hnuai atanga lei a ni.

Vawiin-a sem tak Bolero Camper(4WD BS6) 11 lei nan hian Rs. 1,04,50,000/- hman niin Motor-te hi Health Care delivery a bik takin vaccination drive, Health camp conduct leh awareness pekna tur bakah, kawng that lohna hmun, motor naran in a thlen theih lohna khuate awlsam taka thlen theihnan 4 wheeled drive lei a ni a. Rs. 15,60,000/- senga lei

 damdawi chi hrang hrang 76 - Folic Acid, Oral rehydration salt, Ibuprofen, Ascorbic Acid (vitamin C), Albendazole, Paracetamol leh Diagnostic Kits 50 - Sahli's Haemoglobinometer, Pregnancy Test Kit, Malaria Test Kit, Typhoid Test Kit, BP Instrument Mercurial, Adult Weighing Machine, Hepatitis B-Test Kit leh a dangte Sub Centre/Health & Wellness Centre- te hman tur khuallian hian a hlan bawk.

He Project hian a tum ber chu Health & welness Centre hi mi tam zawkin health care services an dawn theihna tur leh a tlawhtute mamawh damdawi leh diagnostic kit te a thlawna pek chhuah a ni a, health and welness centre hi mi tam zawkin hmang tangkaia, an tlawh tam (footfall) nana kalpui a ni.

Vawiin vek hian Rs. 24,60,000/- senga lei Laptop leh Speaker 52, Mamit District chhung khua tlawh pawh harsa leh health care facility nei thalo khuate tan awlsam zawka health care provider te an biak pawh zung zung theihna turin Telemedicine atan Health Department hnenah hlan a ni bawk.

He hun hi Dr. Lalrozama, IAS, Deputy Commissioner chuan kaihruaiin, Pu Beitlotha Nohro, SDC pawhin report pe-in Health Project hnuaiah Aspirational District kan nih avanga hriselna lama hma kan sawn theihna tura thuam kan nih dante a tarlang a. Dr. Vanlalfela, Chief Medical Officer, Mamit-in lawmthu sawina a nei bawk. 

Minister hi Er. H. Lalzirliana, 3-Mamit Bialtu MLA, Pu C. Lalrammawia, Chairman, ZOHANCO, Health Department Officials, Mamit khawpui chhunga Head of Offices bakah khawtlang hruaitute'n leh thutharthehdarhtute'n an tawiawm a ni.