India ram state puitlinga Mizoram hlan kai a nih champha phak 34-na, Mizoram State Day vawi 35-na chu vawiin khan Lawngtlai DC Conference Hall-ah lawm a ni a. Bawrhsap Dr Andrew H. Vanlaldika chu Khuallian a ni.

Khuallian, Lawngtlai Bawrhsap chuan Lawngtlai District mipuite State Day chibai bukin, state nihna chu harsa taka sual chhuah a nih avangin ngaihlu tur leh state dangte tana state entawn tlaka Mizoram din chhuak tura theih tawp chhuah turin a chah a. Ram hruaitu, sawrkar hna thawk, tlawmngai pawl, kohhran leh mipuite'n ram hmasawn nan mahni hma zawna tih tur theuh hlen chhuahna kawngah theih tawp chhuah tur leh inpumkhatna leh thawh hona tha neih zel tum turin a chah a. Zirna leh faina kawngah tan lak deuh deuh a tul thu uar taka sawiin, khawtlang nun siam tha tur leh mahni intodelh tura tan la turin District mipuite a sawm bawk a ni.

He hunah hian Lai Autonomous District Council (LADC)-a Chief Executive Member (CEM) Pu Manghmung Chinzah pawhin thu sawiin, ram hmasawnna dal thei leh tithuanawp thei, khawtlang nuna siam that ngai awmte chu siam tha a, chak zawka ramin hma a sawn theih nana tan la thar turin kal khawmte chu a fuih bawk.

Lawngtlaia State Day lawmna hun hi LADC Executive Secretary Pu H. Lalramenga'n kaihruaiin, kum 1986 June ni 30-a MNF leh India sawrkarin Remna Thuthlung an ziah fel hnua kum 1987 February ni 20-a Mizoramin state nihna a neih chho dan a sawi a. Lairam Isua Krista Baptist Kohhran General Secretary Rev. B. Zazawna Lai chuan hunserh a hmang a. Lawngtlai District Information & Public Relations Officer Pu C. Lalhruaitluanga'n lawm thu sawiin hun a khar a ni.

Vawiina Lawngtlaia State Day lawmnaah hian LADC-a elected member te, state leh LADC hnuaia officer te, ex-servicemen, tlawmngai pawl leh political party hruaitute an tel a ni.