No.7587/2020-2021

Mizoramin State anih champha vawi 34-na chu Mizoram hmun dangte rualin vawiin khan I&PR Auditorium, CHANEM, Champhaiah Bawrhsap Pi Maria C.T. Zuali hova lawm a ni.

Pi Maria C.T. Zuali chuan District mipuite State Day pualin chibai a buk a. State puitling nih mai bakah rilru puitling neih a tul thu sawiin, rinawmna, taimakna leh mahni intodelh tumna rilru kan neih a ngai a ni, a ti a. Sawrkar chu tu dang nilovin sawrkar siamtu mipuite an nih avangin ram hmangaihna rilru pu tlat chunga mahni mawhphurhna theuhte dik leh fel taka hlenchhuah tum turin mipuite a chah a ni.

State Day lawmna puala thusawitu Pu Lalnunmawia, Principal (Retd.) Govt. Champhai College chuan kum 20 leh thla 3 chhung zet rambuaia awm hnuah India ram state 23 na ni turin India Constitution Article 371-G hmanga Mizoram  ziah luh fel anih thu a sawi a. Mipuite chu State Day lawm duhtawk mai lova, a hlutzia hrie thara tangkai zawka hmang thiam turin a sawm a. Remna leh muanna awm theihna leh State puitling nih theihna kawnga theihtawp chhuahtute hriat reng an nih tawh tur thu sawiin, zahna chibai buk thar leh theuh turin mipuite a sawm a ni.

Thusawitu dang Pu H.S Vanlalfakzuala, President, MNF Champhai North Block-I chuan State puitlinga Mizoram hlankai a nih theihna kawnga hmalakna hrang hrangte tarlangin, nakin lawka ram hmasawn leh changkang, thangtharte tana chhenfakawm leh innghahna tlak siam kawngah ngaihtuahna thar senga theihtawp chhuahho angaih thu a sawi.

He hunah hian Rev R.Lalthapuia, Kahrawt Bialtu Pastor (Presbyterian) chuan hunserh a hmang a. State Day lawmnaah hian Pu Rex Zarzoliana Vanchhawng SP, Sawrkar Office hrang hrang hotute, YMA Sub-Headquarters, District MUP, District MHIP, MJA leh Political Party aiawhte an tel a ni.