No.7586/2020-2021

Vawiin chawhma dar 10:00 khan Convention Centre, Lungleiah Mizoram State Day, 2021 lawmna hun Pu Lawmawma Tochhawng, HPC Vice Chairman hova neih a ni. State Day lawmna ah hian Lunglei District head of office-te, tlawmngai pawl hrang hrang aiawhte, political party hruaitute, media mite leh sawm bik dang mi thahnem tak an kalkhawm. 

HPC Vice Chairman Pu Lawmawma Tochhawng chuan kalkhawmte Mizoram State Day chibai bukin kan ram hruaitu lo ni tawhte beihna leh an inpekna chu a ropuiin Mizo mipuiten kan theihnhilh ngai dawnlo a ni ati a. State puitling dinhmun sual chhuak tura hmalakna hrang hrangte tarlangin harsatna leh buaina nasa tak karah remna leh muanna a awm theih nan ni 30, June 1986 khan inremna thluthlung ziah niin ni 20, February 1987-ah Mizoram chu State puitling a hlan kai a nih thu a sawi a.  State puitling kan nih hnuah hmasawnna ruhrel hrang hrang te nasa taka kan neih belh bakah zirna leh infiamna lamah te, dan leh thupek kenkawh kawngah te, kan eizawnna lamah te hmasawnna tam tak kan hmu a ni, a ti a. State intodelh ni thei tura tan la theuh turin kalkhawmte chu sawmin ka ram tan enge ka tih ve theih, engtinge ka tangkai ve theih tih in zawt fo thin tur leh hma la turin a chah a. Sawrkar hnathawk kalkhawmte pawh thahnem ngai taka ram leh hnam hmasawnna tura theihtawp chhuah chhunzawm zel tura chahin tlawmngai pawl, media leh political party te nena thawhhona tha tak chu chhawmnung zel turin a sawm a ni. 

Lungleia State Day lawmna hun Additional DC Pu R.Vanrengpuia kaihhruaiah hian Pu Lalnundika Hnamte, Asst Professor Govt J Buana College Lunglei chuan Powerpoint Presentation hmangin zirtirna hun a hmang a. Lunglei SDO (S) Pu M.Misael chuan lawmthu sawina hun a hmang a ni. State Day lawmna thingpui ruai kil ho niin, hun tihtawp a ni.