No.7585/2020-2021

February ni 20, 1987-a state nihna dinhmun a Mizoram hlankai a nih champha vawiin khan Mizoram Governor Pu P.S. Sreedharan Pillai hovin Vanapa Hall-ah lawmna hun hman a ni. He hunah hian Chief Minister Pu Zoramthanga, Deputy Chief Minister Pu Tawnluia leh sawrkar hotu dangte an tel a ni.

Governor Pu P.S. Sreedharan Pillai chuan Mizoram mipuite state day chibai bukin, he ni pawimawh takah hian Mizoram chu kawng engkima state hmasawn tak ni tura a duhsak thu a sawi a. Ram zalen tur chuan ram inrelbawlna lama zalenna mai a tawklo a ni tiin Governor chuan ei leh bar, economy lama zalenna, midanga innghat lo a awm theih leh khawtlang nun a zalenna a keng tel tur a ni, a ti a. Chumi a nih avang chuan intodelh a pawimawh hle thu leh, sawrkar laipui pawhin intodelhna kawngah hian hma la in, state tin te pawh theihtawp chhuah tura a duh thu a sawi a. Mizoram chu a chhunga chengte mi tha, dan leh thupek ngaipawimawh mi, inthunun thei tak an nih avanga hmasawnna kawngah pawh puitu tha tak a nih thu a sawi a. Hetih rual hian hriselna kawngah Mizoram chu hma lak a la ngaih hle thu te sawiin, state tan mitinte theihtawp chhuah tlang turin a chah.

Chief Minister Pu Zoramthanga chuan state day ni lawmawm tak hman a ni leh thei chu lawmawm a ti a. State inrelbawlna puitling nei thei tura harsatna tam tak paltlanga, nunna hial chan te an lo awm tawhzia hre reng chungin state day hlutna hi mipuiin kan hriat chian thar leh a pawimawh hle a ni, a ti a. Mizoram chu state thang duang, hausa leh entawntlak a siam chu kan mawh a nih thu sawiin Chief Minister chuan intodelh chu kan hmabak lian ber zing a mi a ni a ti a. State hausakna te hi hmang tangkai a remhriatna nen theihtawp chhuah turin mipui sawmin, sawrkar chuaha innghat lova kohhran, tlawmngai pawl leh mipui thawhhona tha kan nei zel hi a lawmawm hle a ni, a ti bawk.

Vawiin State Day lawmna inkhawm hi Chief Secretary Pu Lanunmawia Chuaungo chuan kaihruaiin, NGO Coordination committee atangin thusawi ngaihthlak a ni bawk a. Additional Chief Secretary Pu JC. Ramthanga chuan lawmthu sawiin hun a khar a ni. Vanapa Hall-a inkhawm hi Mizoram sawrkar GAD buatsaih niin, Speaker, Govt. Chief Whip, Deputy Speaker, Minister leh MLA te bakah sawrkar department hrang hranga hotulu leh sawm bikte an tel a ni.