1226/2022-2023

Khawzawl, the 12th July, 2022: Sawrkar laipui Ministry of Textiles hnuaia Development Commissioner for Handlooms, New Delhi leh Mizoram Handloom and Handicrafts Development Corporation Limited (ZOHANDCO) tangkawpin  National Handloom Development Programme (NHDP) hnuaia a buatsaih State Handloom Expo- 2022 chu vawiin chawhma khan Khawzawl Vengthar YMA Hall-ah neih tan a ni. Hawnna hun hi Khawzawl District Bawrhsap Pu C.C. Lalchhuangkima chuan khuallian niin a hmanpui a, a duh leh mamawh apiangte dawr theih turin State Handloom Expo-2022 chu a hawng a. Thupui atan 'My Handloom My Pride' tih hman niin, Mizo puantah leh hmanraw dang  hrang hrangte man tlawm zawka lei theih a ni a, hengahte hian discount za zela 10% -20% thlenga siam a ni.

He huna Khuallian Khawzawl DC, Pu C.C. Lalchhuangkima chuan ZOHANDCO in State Handloom Expo Khawzawla a buatsaih chu lawmawm a tih thu sawiin, kutthemthiamna hian kan ram economy a chawikang thei a, engtikahnge khawvel mithmuhah kan thil siam chhuah, a bik takin puantah leh thiamhnangdeh lam hi kan phochhuah ve theih ang tih hi zawhna pawimawh tak niin ka hria tiin, kan hnam thuamte hi khawvel mithmuhah a zahpuiawm loh a ni, a ti a. Handloom lamah Khawzawlin theihna nasa tak a neih thu sawiin, hemi kawngah hian ZOHANDCO chu hmalak pui turin a sawm a. Handloom Expo kaltlanga thil zuartute chu  an thil siam chhuahte a man phu tawk mai bakah miten rinrawla an hman tak tak theihna tura quality tha pho chhuah tum turin a chah a. Thil siam quality tha chuan  rintlak min nih tir a, chu chu kan than zelna atan a tul a ni, a ti bawk.

Handloom Expo hawnna inkhawm kaihruaitu Pu C.Lalrammawia, Chairman ZOHANDCO chuan thu sawiin, “ZOHANDCO din thar leh a nih chungchangah hian puantah leh thiamhnangdeh lama eizawngtute tan malsawmna nih chu ZOHANDCO tum ber a ni” a ti a. ZOHANDCO Chairman chuan “Tunhma chuan Manipur State atangin puan kan lei thin a, tunah chuan kan thawn let tawh zawk a, hei hi hmasawnna duhawm tak a ni” a ti a. ZOHANDCO din thar a nih leh hnua  puantah leh thiamhnangdeh lama eizawngtute tan Sawrkar laipui-ah project engemawzat thawn thlak a ni tawh thu leh hmalaknate ngaihchan mek a nih thu a sawi a. Mizoram District Headquarter-ahte Handloom Expo buatsaih kim a nih tawh thu tarlangin, Khawzawl mipuite handloom lama tan la thar turin a chah a. Mizo mipuite pawh changkang zelin hnam thuam inbel kan zahpui lo telh telh a, kan chawisang zel hi a hluin a vanneihthlak hle a ni, a ti a.  Mizo kan pung zel a, puantah leh thiamhnangdeh lama eizawnna pawh hian hma a sawn zel dawn a, beidawnna piah lamah  hlawhtlinna a intan thin a ni tih hria theihtawp chhuaha handloom chawisan kawnga hma la turin mipuite a sawm a ni.

Hawnna programme hman zawh hnu hian khuallianin State Handloom Expo puala Stall 30 siamte a fangkual a, hemi hnu hian Handloom Expo chu a duh leh mamawhtu apiangte dawr theih tura hawn tan a ni. Handloom Stall-ah te hian Mizoram hmun hrang hrang atanga puantah thiamte kutchhhuak incheina, hnam thuam hrang hrang mawi tak tak zawrh chhuah a ni a, ZOHANCO chuan mipuite chu State Handloom Expo 2022 chhim vek turin a sawm a ni.

Expo hawnna inkhawmah hian Khawzawl SP, Project Director, DRDA, DUDO leh Sawrkar mi pawimawh thahnem tak an tel a, Stall 30 siam niin tunkar Zirtawpni thleng a awh dawn a ni.