No.2557/2021-2022
Aizawl, the 11th October, 2021: Vawiin chawhma dar 11:00 khan DC Conference Hall, Khawzawl-ah Faina Hapta (Cleanliness Week), 2021 denchhena Khawzawl District chhunga thingtlang (Rural) khuate fai intihsiakna result puan leh lawmman semna hun hman a ni.

He hun kaihruaitu Pu C.C. Lalchhuangkima, Deputy Commissioner & Chairman, District Water & Sanitation Mission (DWSM), Khawzawl District chuan lawmman dawngtute a lawmpui thu a sawi a. Faina chu hunbi nei lo, kan nunphunga sengluh tur a ni tiin, Faina hapta piahlamah pawh fai chhunzawm reng turin lawmman dawngtute leh kalkhawmte a chah a. Fai intihsiakna result puan leh lawmman semna hun a hmang chhunzawm a ni.

Faina Hapta (Cleanliness Week), 2021 denchhena Faina kawnga inelna hi Khawzawl District-ah chuan khawpui (Urban) leh thingtlang (Rural) ah a hranin kalpui a ni a. Khawpui fai inelna hi UD&PA Depatment-in buatsaihin October ni 8 khan a kharna hun hman a ni a. Thingtlang rural areas bika intihsiakna hi Public Health Engineering (PHE) Department leh District Water & Sanitation Mission tangkawp buatsaih niin, October ni 2 atanga ni 9 chhungin Khawzawl District chhunga thingtlang khaw hrang hrangte chu khawlai fai mai bakah School, Anganwadi, VC House/BNRGSK leh vantlang bungraw pawimawh thenkhat heng - Community Hall, Vantlang inthiarna, Waiting shed leh hmunhma dangte uluk taka endik a ni a. Khaw hrang hrang 24 te chu Sawrkar department hrang hrang atanga Officer 11 (sawmpakhat) te insemdarhin October ni 2 atanga ni 8 chhungin a hmunah tlawhin an endik a ni.

Vawiina fai intihsiakna lawmman semna hunah hian Pu Lalzakhama, Sr. Executive Engineer, PHE Department & Member Secretary, DWSM in report pein, intihsiaknaah hian Covid-19 hrileng hluar zualna tih loh District chhunga khua (Rural) zawng zawng endik a ni, a ti a. Pawnlam langsar lai chauh en lovin, building chhung lam a fai tha em, a tul ang zelin eisiamna hmun a thianghlim em, inthiarna a awm tha em, bawlhhlawh paihna a awm tha em tihte en vek a nih thu a tarlang a ni.

Khawzawl District-a thingtlang khuate fai inelnaah hian Rabung leh Arro khuate chu pakhatna niin, certificate leh pawisa fai Rs. 5,000/- ve ve an dawng a. Khualen leh Tualpui khuate chuan lawmman pahnihna la in, certificate leh pawisa fai Rs. 3,000/- ve ve an dawng a. Pathumna Sialhawk khuain certificate leh pawisa fai Rs. 2,000/- an dawng bawk a ni. Intihsiaknaa tel zawng zawngte hian consolation prize atan certificate leh pawisa fai Rs. 1,000/- theuh an dawng dawn bawk a ni.

Result puan leh lawmman semna hunah hian Pu Eliza Vanlalpeka, PHED SDO, Pu H. Lalramenga, SDC leh Pu TC Lalhmachhuana, SBM (Gramin) District Co-ordinator-te bakah lawmman pakhatna atanga pathumna dawngtu khua Village Council atangin aiawh pahnih theuh an tel a ni.

Attachment

  • Loading attachment...