630/2024-2025

Khawzawl, 31st May 2024: Lok Sabha Inthlanpui 2024 a vote tla te chhiar tura inbuatsaihna kal zelah vawiin khan Khawzawl DC Meeting Hall-ah Khawzawl District Election Officer Pu K. Lalrohlua kaihhruaiin Election Official te leh Khawzawl District chhunga Telecom leh Internet Service Provider te an thu khawm a. Tluang taka vote chhiar a nih theih nan thawhhona tur hrang hrang te an sawi ho.

Khawzawl Bawrhsap Pu K. Lalrohlua chuan Telecom leh Internet Service Provider te chu a loa awm theih loh ‘Essential Service’ an ni, a ti a. June ni 4, 2024-a Lok Sabha Inthlanpuia vote tlate chhiar an nih hunah khaihlak lova Mobile leh Internet Signal a awm theih nan tan la turin Network Service Provider te chu a chah a ni.

Pu K. Lalrohlua chuan May ni 28, 2024-a Cyclone Remal vanga chhiatna a thlen khan Chief Minister Pu Lalduhoma, Home Minister Pu K. Sapdanga leh DM& R Secretary Pi K. Lalrinzuali te hovin Aizawl DC Office-ah Control Room siam a ni a, District hrang hrang report an ngaichang a, Network zawng zawng a tawp vek avangin District Report pe thei lo bikah Khawzawl a awm chu a mualphothlak hle a ni, a ti. Fur pui a lo thlen hunah chhiatna hrang hrang a lo thlen palh pawhin rang taka chhawmdawlna leh tanpuina ruahman a nih theih nan engtik lai pawha Mobile leh Internet Signal an pek chhuah a tul a ni tih hre thar turin Service Provider te chu a ngen.

Thutkhawma tarlan danin Khawzawl District chhungah hian Mobile Tower 33 a awm mek a. P&E Department hnuaiah Optical Ground Wire (OPGW) hmangin Zuangtui atangin Khawzawl Hermon 132Kv Sub-Station-ah Internet Access Point bun fel tep tawh a ni a, hna za a 95 % thawh zawh tawh niin, bun fel a nih chuan Khawzawl District-ah Internet chak leh changtlung zawk a awm theih beisei a ni.

He hunah hian Khawzawl Addl DC Pu Lalfakzuala; Khawzawl P&E Division EE Pu NG Lalruatsanga leh Election Officer Pu Timothy R. Lalhmangaiha te bakah Khawzawl District chhunga Telecom leh Internet Service Provider te an tel a ni.