629/2024-2025 

Aizawl, 31^st May, 2024: June ni 4, 2024 a 1-Mizoram (ST) Parliamentary Constituency hnawhkhahna atana General Election to the Lok Sabha, 2024 vote chhiar tura inbuatsaihna hrang hrangte tluang taka kalpui niin, vote chhiar turin Mizoram a inpeih ta. Vote chhiarna hmun tur Counting Hall-te chu Election Commission of India thupek angin vote chhiar hma ni 3 ah buatsaih fel vek tur a ni a, hengte hi District hrang hrangah peihfel vek tawh a ni.

Vote chhiar tura mawhphurhna hrang hrang neite’n training an nei zo fel tawh a. Vote chhiarnaah hian Returning   Officer, Assistant  Returning  Officer,   Counting Supervisor, Counting Assistant, Micro-Observer leh hna pawimawh dang hrang hrang thawktu mi 2000 vel an awm dawn a. Security mi leh sa ten Counting Centre tinah thuah thumin venhim hna an thawk dawn a ni.

Mizoram pumah Counting Centre 13 ruahman a ni a. Aizawl District-ah Counting Centre 3 aawm ang a, District dang zawngah Counting Centre 1 theuh a awm ang. Counting Hall 40 a awm dawn a, heng Counting Hall-ah hian Counting Table 379 awmin vote chhiarna dawhkan tinah hian Counting Supervisor pakhat, Counting Assistant pakhatleh Micro-Observer pakhat zel an awm dawn a, vote chhiarna hmun hi ECI ruat Observer   ten an vil dawn a ni.

Counting Table awm zat leh vote chhiar tur Counting Station awm zat hian chhiarhun (round) pawh hi a hril dawn a. Round 5 a chhiarzawh tur Assembly Segment 5 a awm a, Round 4 a chhiar zawh tur awmna Assembly Segment 15 a awm a, Round 3 awmna Assembly Segment 18 awmin Round 2   a chhiar zawh tur Assembly Segment 2 a awm a ni.

Zing dar 8:00 atanga vote chhiar tan tur niin Aizawlah chuan Postal Ballot chhiara bultan a ni dawn a, Postal Ballot chhiar tan a nih atanga minute 30 hnuah EVM (Control Unit) a vote tlate chhiarzui nghal a ni ang. Vote chhiar lai hi Candidate, Election Agent leh Counting Agent-te’n a hmunah an en thei ang.

EVM (Control Unit) a vote tla chhiar zawh vek hnu hian Assembly Segment tina Polling Station 5 a VVPAT a vote tla (paper slip) te chu EVM (Control Unit) a vote tla nen a inmil em tih finfiah zel tur a ni a, VVPAT chhiarturte hi pawhfuh hmanga thlan tur a ni. Hetianga VVPAT-a vote tlachhiar (mandatory verification) hi inthlanpui hmasaah khan Assembly Segment tina VVPAT pakhat zelah neih a ni a, kuminin thlanpuiah hian Assembly Segment tinah VVPAT 5 zel chhiar tel tawh tur a nih dawn avang leh heng VVPAT te hi a ruala chhiar lova a indawta chhiar tur a nih avangin vote chhiar hun chhung pawh a rei phah hret thei dawn a ni. 

Vote chhiar hi rang leh felfai taka mipui hnena puanzar a nih theih nan District hrang hranga Counting Centre tinah Media Centre dah zel a ni a. Vote chhiar result-te rang leh felfai zawka phuahkhawm a mipuite hriattura puanzar zung zung a nih theih nan CEO Office, Mizoram chuan a hnuaia tarlan ang hian ruahmanna siam a ni:-

STATE CONTROL ROOM:

Location: Office of the Additional Chief Electoral Officer-I, 4th Floor, Old Secretariat Building - I.

State Control Room hnuaiah hian peng pawimawh hrang hrang hetiang hian din a ni bawk:-

A. COMMUNICATION CONTROL ROOM:

Location: State Data Centre, Department of ICT, 2nd Floor, Old Secretariat Building-I.

Round tina vote chhiar result-te lak khawm zung zung a nihtheih nan Data Collection Team siam a ni bawk.

 B. MEDIA MONITORING CONTROL ROOM:

Location: ICT Video Conference Room, 4th Floor of Old Secretariat Building -I.

 A hnuaia table ah hian District hrang hranga vote tla chhiar tura official awm zat leh Counting Hall leh Table awmzat tarlan a ni :