4178/2023-2024

Khawzawl, 15th March 2024: Vawiin khan Khawzawl DC Auditorium-ah World Consumer Rights Day 2024 pualin hun hman a ni a. Pu Lalfakzuala, Addl DC chuan khuallian niin he hun hi a hmanpui a, he ni puala thupui thlan ‘Fair and Responsible AI for Consumers’ tih chu zir ho a ni.

Khuallian Pu Lalfakzuala chuan Mizoram Consumers’ Union, Khawzawl District Headquarters ten Consumer te dikna chanvo humhalh tura hma an lakna chu fakawm a tih thu a sawi a. Khawzawl Town Area-ah LPG Home Delivery leh Online-a LPG order theihna mumal zawka kalpui a tul tih a sawi bawk.

Pu Lalfakzuala chuan he huna sumdawng pawl hrang hrang hruaitu kalkhawmte chu anmahni dawrtute lungawi lohna chu zirlai tha bera ngai turin thu a chah a. Khawvel hi misualte thil tha lo tih vang ni lovin, mi tha te an ngawih reng vang zawkin a chhe zual thin a ni tiin khuallian chuan thil tha lo dona kawng pawimawh tak chu Consumer te dikna humhalh hi a ni, a ti.

World Consumer Rights Day puala hun hman hi Pu R. Lalthawmmawia, Khawzawl MCU Hqrs President chuan a kaihruai a. District Civil Supply Officer Pu Vanlalchhuanga chuan World Consumer Rights Day 2024 pual thupui ‘Fair and Responsible AI for Consumers’ sawizauna hun a nei a; Pu Lalhmangaihzaua, Secretary, MCU Khawzawl Hqrs chuan MCU chet velna hrang hrang report a pe bawk a ni. Pu FK Lalsangluaia, MCU Khawzawl Hqrs Treasurer-in lawmthu sawina hun a hman zawhah inkhawm hi tih tawp a ni.