4860/2025-2026
Dated Khawzawl, 17th March, 2026 : Vawiin chawhma dar 11:00 khan DC Conference Hall-ah Khawzawl District Consumer Union bultumin World Consumer Rights Day hman a ni a, Khawzawl District Bawrhsap Pu K. Vanlalthiana chuan khuallian niin a hmanpui a. Kumin thupui atan hian 'Safe products, confident consumers' tih hman a ni.

He hun hi Pu F.K. Lalsangluaia, Vice President, Khawzawl District Mizo Consumers Union (MCU) chuan a kaihruai a, Bawrhsap, Pu K. Vanlalthiana chuan thu sawiin Consumer-te’n thil kan lei reng reng hi mihring hrisel nan leh damkhawchhuah nana him a ni tur a ni a, hemi kawngah hian consumer te’n dikna chanvo kan nei tih hriat a tul thu a sawi a. Consumer te’n duhthlanna kan neih hi rahbeh sak kan nih fo thin avangin dikna chanvo kan neih te hriat a tul a. Sorkarin Consumer te harsatna sutkianna tura lungawilohna neihte zualkona tur a siamsak te a tarlan bakah mawhphurna kan neih ve te sawiin, thil kan lei dawna a label leh instruction-te chiang taka chhiar bakah Product quality-te chiang taka hriat a tul thu a sawi a. Heng bakah hian thil kan lei reng rengin Bill/Receipt lak ngei thin a tul thu te, Advertisement nazawng hi thil tha a nih vek loh avangin consumer te fimkhur a ngai a. Thil diklo hria chuan thuneitute hnena report zel turin a chah bakah dan kan hriatte midangte hnena hrilhhre ve zel turin leh a hralhtute laka lungawilo mai lova consumer tha tak ni turin a chah bawk a ni.

Pu Patrick Thiandanga, District Civil Supplies Officer (DCSO), Khawzawl pawhin thusawina hun neiin, thupuiin a tarlan anga mipuite ngaihngam taka kan awm theih nan thil zawrhte a him a tul thu a sawi a. Tunlai khawvelah product him kan mamawh em em a, hrisellohna hrang hrang kan nitin nuna kan hman atanga lo thleng thei anih avangin kan thil hman reng rengah ISI, AGMARK, FSSAI, BIS leh Eco Mark chuang ngei lei thin a tul thu a sawi a. Consumer te pawhin dan hrang hrang kan neihte internet atanga en theih a nih ang a, kan theihna zawn theuha inzir zel turin leh Consumer kan nih anga tha taka mawhphurhna kan neihte hlen theuh tur kalkhawmte a sawm a ni.

World Consumer Rights Day hi kum 1983, March ni 15 atanga khawvel puma hman tan a ni a, hemi ni hi khawvel puma ngaihpawimawh niin, diklo taka sumdawnna lak atanga consumer te dikna chanvo humhalhna leh mawhphurna inzirtirna ni a ni a. Consumer pawl hrang hrang insuihkhawm te’n he ni hi dan in hrilhhriatnan leh campaign-na hun atan an lo hmang tawh thin a ni.

He hunah hian Khawzawl District Consumers Union (KDCU), Consumers Club Member, DCSO Staff te bakah Khawzawl District NGO hruaitute kim takin an tel a, Pu Lalramhluna, IFCS Khawzawlin lawmthu sawiin he hun hi a khar a ni.