1380/2026-2027 

Dated Khawzawl, the 13th July, 2026 : Vawiin khan Khawzawl Bawrhsap Pu K. Vanlalthiana chuan Chief Medical Office hmalaknaa World Population Day 2026 puala Zaingen YMA Hall-a hun buatsaih chu khuallian niin a hmanpui a. Sr. Medical Officer, Khawzawl District Hospital Dr. Zozikpuii chuan hun a kaihruai a ni.

Khuallian Pu K. Vanlalthiana chuan thu sawiin, July 11, 1987-a Croatia rama nau piang pakhat chu khawvela mihring tluk leh dingawn 5 kan tlinna niin UNDP ten an chhinchhiah a, chumi denchhen chuan kum 1990 atang khan United Nations General Assembly chuan July 11 chu khawvel puma World Population Day-a hman turin a puan thu a sawi a. Kum 2026-ah hian khawvela mihring awm zat hi tluk leh dingawn 8.3 niin, mithiamten an chhut danin kum 2100-ah chuan tluk leh dingawn 10.9 a nih tur thu a tarlang a. Bawrhsap chuan Khawzawl district-ah mihring awm zat kan pun loh thu leh pianpun kan mamawh thu a sawi a. Mihring kan tlem chuan ram hmasawn a harsat thu tarlangin kan ram leh hnam kan dinchhuah nan pianpun mai bakah pempun pawh a pawimawh thu a sawi a. Chutih rual chuan kan ram leilung dinhmun hre renga, kan eizawnna ngaihtuah chunga, mithiamte thurawn ngaichang zelin, awmze nei taka kan ram leh hnam humhalh leh tihhmasawn nan pianpun lama rilru seng turin kalkhawmte a chah a ni.

Chief Medical Officer (CMO) Dr. Shahnaz M. Zothanzami pawhin World Population Day theme sawizauna hun neiin, fa enkawlnaa mawhphurhna tha taka hlen chhuak tur chuan naupang lutuk emaw zing lutuka fa neih hi tih loh tur a ni, a ti a. Naupang lutuka fa neih leh chhang zing lutuka fa neih avanga harsatna thleng thei thenkhat chu naute-ah thla kim lova pian, pianhlima te emaw zang lutuk, thanthu leh thihna hial te a ni a, nu-ah thisen tlakchhamna, rai laia BP sang, chhul thler, rilru lama harsatna leh thihna hial a thleng thei bawk a ni. Chhungkaw hlim leh hrisel din tur chuan kum tlin hnuah ngei leh chhungkua enkawl tura inrintawk hnuah chauh nupui pasal neih a pawimawh a. Nu HIV veite pawh nau pai hma thla 6 atanga ART tha taka an lak chuan HIV kaichhawng lovin fa an nei theih thu a tarlang bawk a. Mizoramah Total Fertility Rate (hmeichhia-in a dam chhunga fa a neih zat) chu 1.6 chauh a nih thu tarlangin, kan ram leh hnam humhalh nan puitling chinte chuan pianpun lama ngaihtuahna an sen a pawimawh thu a sawi bawk.

Health Supervisor, Khawzawl MC, Pi F. Lalrokungi chuan lawmthu sawiin hun a khar.