1379/2026-2027

Aizawl the 13th July, 2026: Vawiin nileng khan Mizoram CEO Office buatsaihin I&PR Conference Hall, Lianchhiari Run, Aizawlah Mizoram puma Electoral Registration Officer (ERO) leh Assistant Electoral Registration Officer (AERO) te pualin Special Intensive Revision (SIR) 2026-a hming paih, inthunthar leh siamthat hun (claims and objection period)-a an mawhphurhna chipchiar taka zirhona hun neih a ni a. Joint CEO Pi Ethel Rothangpuii’n he hun hi a kaihruai a ni.

Pi Ethel Rothangpuii chuan Special Intensive Revision pawimawhzia sawiin ram leh hnam khawih thil a ni a, theihtawp kan chhuah a ngai, a ti a. Enumeration phase a zo a, Draft Electoral Roll hlawhtling taka tarchhuah a ni tawh a; tunah chuan claims and objection period ah an awm mek thu leh he hunah hian ERO leh AERO te tihtur pawimawhzia sawiin training a tel zawng zawng te rilru leh tihtakzet a hun hmang turin a hrilh a ni.

SIR 2026 Final Electoral Roll tarchhuah a nih hunah vote nei thei zawng zawng Electoral Roll-a an chuan theihna tur leh, vote nei thei lo te he Roll-ah hian an hming a lan ve lohna tura theihtawp chhuah a tul, Joint CEO chuan a ti a. Final Electoral Roll-ah hian hming lang lo tur an lo lang a nih chuan, anmahni mai bakah an tuchhuante thlengin India khua leh tui, vote nei thei nihna an neih tawh dawn avangin ERO leh AERO ten ram leh hnam hmangaihna thinlung puin, fimkhur takin hna an thawk tur a ni, a ti.

Training hi vawiin nileng khan neih a ni a. Chawhma lamah Champhai, Lunglei, Lawngtlai, Serchhip, Mamit leh Saitual District ten hun an hmang a. Chawhnu lamah Aizawl, Kolasib, Hnahthial, Siaha leh Khawzawl District huamchhunga ERO leh AERO te an training a. State Level Master Trainer Lalnunfela Chawngthu leh Pu Timothy T Lalhmangaiha ten an zirtir a. Zawhna leh chhanna bakah, sawihona hun an hmang nghal a ni.