4366/2024-2025

Khawzawl, dated 21st February 2025: Vawiin chawhma dar 11 khan DC Meeting Hall-ah Foundational Literacy and Numeracy (ziak leh chhiar) naupangin an thiam zawk nana standardized test hman chungchang sawi ho a ni a, Khawzawl DC Pu K. Vanlalthiana'n meeting hi a kaihruai a ni.

Foundational Literacy and Numeracy (FLN) chungchang sawi hawng turin chairman Pu K. Vanlalthiana chuan SDO (Sadar) Pu Suvigya S. Chandra, IAS a sawm a, ani hian SCOPE app chungchang a sawi hawng. He app hmang hian naupang ziak leh chhiar thiam chin tehin an tlakchhamna te a chhinchhiah theih tih a sawi. Standardized test hmangin naupang enfiah an ni ang a, heta an tihthat dan hi SCOPE app hmangin chhinchhiah a ni ang a, hmalak dan tur a hriat theih dawn a ni tih a sawi. He app hi April ni 7, 2025 hmaa peihfel hman tum a ni a, a tira en chhin nan sikul 5 thlan niin meeting chuan Govt. Khawzawl PS I, II & III, Govt. Chawngtlai PS I leh Govt. Lungtan PS thlan a ni. Sikul tinah hian coordinator thlan an ni a, anni hian a app hman dan te, test kalhmang te leh thil tul dang te zirin an lo buaipui dawn a ni.

Chairman Pu K. Vanlalthiana chuan thutkhawmnaa hun hlu tak senga lo kal khawm te hnenah lawmthu a sawi a, naupang te lehkha zirna lamah hma an sawn zel theih nan theihtawp chhuaha he hmalakna hi ngai pawimawh ngei turin a sawm a ni.

He hunah hian Addl. DC Pu Lalfakawma, SDC Pu Paul Rokima, SDEO Kawlliana Kawlni, Dy. DPC K. Thantluanga leh sikul teacher te an tel a ni.