4365/2024-2025

Saitual, the 21st February, 2025: Tukin dar 7:00 khan District Hub for Empowerment of Women (WCD) Saitual District buatsaihin CI Kawn, Saitual Chhim vengah One Nation, One Helpline puala kawng zawh (Rally) neih a ni a, he hun hi Pi Mary Malsawmkimi, District Mission Coordinator, DHEW chuan kai hruaiin, rally hi Pi Christina Lalnunfeli, SDC in a vai liam.

He hunah hian hun kaihruaitu Pi Mary Malsawmkimi, DCM chuan kalkhawmte hnenah lawmthu a sawi a, One Nation, One Helpline pawimawhna te a sawi zau nghal a ni. DCM chuan mi tin ten mobile phone hmangin balance nei lo pawhin ni khata darkar 24 chhunga engtik hunah pawh tanpuina leh mamawh ang te awmhmun atangin an dil thei tih a sawi a, office dawr nana hun leh tha khawh ral ngai loin awlsam leh rang zawkin mi ten tanpuina an dawn theih phah dawn a ni, a ti. Pi Mary Malsawmkimi chuan call dawn te hi a call tu sawi chhuah phal loh “confidential” vek a nih avangin, thenawm khawvengah te hmeichhia emaw naupang emaw chunga hleilenna thleng a awm a nih chuan, report hreh lo turin kalkhawmte chu a chah a ni.

Pu HVL. Thlanga, Const., SDPO pawhin thu sawiin, One Nation One Helpline din a nih dan te a tarlang a. Helpline hrang hrang te sawi fiahin, 181 chu hmeichhe tanpuina tur “women helpline” a ni tih a sawi a, 1098 chu naupang tanpuina “child helpline” niin, 112 chu huap zau zawk “emergency response” hrang hrang dam lohna te, rikrum thil te leh khuarel chhiatna hrang hrang thleng thulha tanpui dilna tur a ni, a ti. Pu HVL. Thlanga chuan helpline no. te hi inbumna leh uan nana hman tur a ni lo a, misual ten hremna an hmuh ngei theihna tur leh tanpui ngai ten tanpuina an hmuh ngei theihna tura hman tur a ni tih sawiin, kalkhawmte chu heng helpline te hi a tulna apiangah hmang thin turin a chah a ni.

Pi Christina Lalnunfeli, SDC pawhin thu sawiin WCD te chu hmeichhia te leh naupang te tana an thahnemngaihna te fakawm a tih thu a sawi a. SDC chuan khawthlang rama an helpline no. “911” hriat lar a nih ang bawkin, kan rama helpline no. pawimawh tak tak te hi tihlar a, chhuangkuaah te inhrilhriat tam a pawimawh hle a ni, a ti. Pi Christina Lalnunfeli chuan thu sawi zawhah rally hi a vai liam zui nghal a ni.

Vawiin One Nation, One Helpline Rally hi hi Pi Mary Malsawmkimi, DCM, DHEW-in a kai hruai a, Pu HVL. Thlanga, Const., SDPO in thu sawiin, Pi Christina Lalnunfeli, SDC chuan rally hi a vai liam a. Rally-ah hian Saitual District-a YMA member te an tel a, hun tawp kharna hi Saitual PWD kawnah neih niin, Pu Samuel Lalremruata, Accounts Assistant, DHEW chuan lawmthu sawinain khar a ni.