616/2024-2025

Khawzawl, 31st May 2024: Lok Sabha Inthlanpui a vote tlate June ni 4, 2024-a chhiar tura inbuatsaihna kal zelah vawiin chawhma khan a tum hnihna atan vote chhiar tura ruat Counting Official te chu khawl hmanga thliar fel an ni a. Khawzawl Bawrhsap, Lok Sabha Inthlanpui-a Assistant Returning Officer (ARO) Pu K. Lalrohlua leh Addl DC, Pu Lalfakzuala, ARO (Counting) te kaihhruaina hnuaiah 2nd Randomization hi neih a ni.

Inthlanna felfai, langtlang leh thianghlim a awm theih nan ECI ruahman angin Counting Official te hi tum thum khawl hmanga thliar fel an ni dawn a. 1st Randomization lamah Counting Micro-Observer, Supervisor leh Assistant tur te khawl hmanga thlan chhuah an lo ni tawh a. Vawiin 2nd randomization-ah hian Counting Official-te duty pui tur team tih fel a ni a, Khawzawl District Administration hnuaiah hian Assembly Segment pakhat – 22-Tuichang chiah a awm avangin official-te duty-na tur Assembly Segment hi thliar fel a a ngai lo a ni. 3rd Randomization hi vote chhiar ni – June ni 4, 2024 zing dar 05:30 -ah neih a ni ang a, he hunah hian an duty-na tur dawhkan tih chian a ni ang.

Tarlan tawh angin Khawzawl District, 22-Tuichang chhunga vote tla te hi Khawzawl DC Auditorium-ah June ni 4 zing dar 08:00 atangin chhiar tan tum a ni a. Polling Station 28-a vote tla te hi dawhkan 14-ah thawh hnih a chhiar zawh tur a ruahman a ni. Vote tla te chhiar tur hian Counting Micro Observer 18, Counting Supervisor 18 leh Counting Assistant 19 an awm dawn a ni.