615/2024-2025

Champhai, the 31st May, 2024: Champhai District chhunga leichi lakluhte thlithlaia dan ang taka hralhchhuah a ni em tih leh, dan lova tawlh ruk a awm em tih thlenga endik tura Sawrkarin a din, Champhai District Vigilance Committee on Fertilizers chu vawiin chawhma dar 10:30 khan an Chairman Pu James Lalrinchhana, District Bawrhsap hovin a Pisa-ah an thukhawm.

District Bawrhsap Pu James Lalrinchhana chuan loneitute'n an chanpual leichi (fertilizer) kokim taka an hmuh theih nana ruahmanna siam chu Sawrkarin a ngaih pawimawh thu sawiin, Champhai District chu leilet siam leh thingtlang lo nei tamna a nih avangin leichi mamawhna a sang a, an hmakhua ngaiin an chanvo an hmuh ngei theih nan hmalak tlan a ngai a ni, a ti a. Leichi te'n a mamawhtute kut a thlen ngei theih nan leh hmun danga tawlhruk a awm loh nana tanlak zel a nih tur thu sawiin, fertilizer khuahkhirhna tha taka kalpui a ni chu lawmawm a tih thu a sawi a. YMA leh VC te thlawpna fakawm a tih thu tarlangin, dan tlawhchhana hmalatu enforcement agency-te chhuanawm tiin hmalakna chhunzawm zel turin a chah a. District chhunga leichi luh leh chhuah dante uluk taka vil zui zel a pawimawh thu a sawi bawk.

DAO Champhai Pi R. Lalramhluni, Member Secretary, District Vigilance Committee on Fertilizers chuan loneitute'n mamawh zat leichi an chan theih nan kum 2023 atangin awmze nei zawkin YMA leh VC te nena tangtlangin hmalak a nih thu leh hei hian buh leh thlai thar pun kawngah rah tha a chhuah thu a sawi a. VC leh YMA te nen inrawntlangin khawtin leichi mamawh zat allotment siama sem chhuah thin a nih thu sawiin, tun dinhmunah Champhai District khaw tinah Urea a thlen tawh thu a sawi a. DAO chuan Fertilizer Dealer 7 kaltlanga July 2023 atanga March 2024 chhunga allotment neih dan leh kumin kharif season atana khaw hrang hrang Urea mamawh dan report lakkhawm a sawifiah nghal bawk.

He hunah hian Champhai District khaw hrang hrang VC leh YMA kaltlanga leichi (Urea) mamawh zat report leh Champhai District tana Fertilizer Dealer 7 te allotment neih dante thlirho a ni a. Mipui mamawh phuhru turin dealer kaltlanga fertilizer pek chhuah tur zat bituk siamfela pawm a ni a, Urea man hi Dealer Godown-ah bag khat (45 Kg) Rs 500/- a lei theih a ni. Tun dinhmuna mamawh report zat baka allotment la bangte chu dealer kaltlangin a mamawhte hnena zawrchhuah nise tih a ni.

Urea chauh ni lo, fertilizer dang DAP leh MOP hmang duhte hnena chhawp chhuah dan tur leh balance fertilizer kalpui kawnga hmalak dan turte pawh ngaihtuahho niin, tun dinhmunah Champhai District chhunga fertilizer dealer 7 zingah DAP leh MOP bik supply-tu Indian Potash Limited (IPL) Company dealer 1 a awm mek thu tarlan a ni a. Rate mumal tak bakah a sem chhuah dan tur sawiho niin, DAP bag 1 (50 Kg) chu Rs 2,200/- leh MOP bag 1 (50 Kg) chu Rs 2,500/- zela zawrchhuah nise tih niin, permit ziaka neite hnenah chauh hralh nise tih a ni a. April leh May, 2024 atana allotment neih zat DAP bag 1600 leh MOP bag 600 te chu chah thleng thuai turin dealer lam hriattir nise tih a ni bawk.