Khelo India National Football-a champion Mizoram team lawmpuina hun chu vawiin chawhma dar 11:00 khan Pu H.L.Rochungnunga IAS, Secretary, Sports & Youth Services Office Chamber, New Secretariat-ah neih a ni.

20-24, February 2017 chhung khan Chennai, Tamil Nadu-ah Khelo India National Competition Group III neih a ni a, Mizoram mipa team chu football-ah an champion. Mizoram team hian an match hmasa berah West Bengal nen goal thun lovin an inhnehtawk a, hemi hnu hian Punjab chu sikhat faiin an hneh leh a. Puducherry 5-0 a hnehin Madhya Pradesh 1-0 in an hneh leh a, Chhatisgarh chu 6-1 a hneh lehin semifinal-ah Kerela nen 1-1 in an inhnehtawk a, penalty shootout hmanga chak zawk zawnnaah 3-0 in hnehna an chang. Final-ah West Bengal nen inhmachhawn lehin hun pangngaiah goal an khung lova, penalty shootout hmanga chak zawk zawnnaah 5-4 in an chak a, an champion ta a ni.

Pu H.L. Rochungnunga, Secretary SYS leh Khelo India Mizoram State-a Chairman ni bawk chuan Mizoram team a chhuan thu a sawi a. "Central Service-a tlingte hian Mizo hming an titha thin a, mahse Mizo hming titha leh zual thintute chu kan infiammite an ni. Tribal quota awm ve lohnaah state changkang leh lian, hausak zawk bawk si te nen theihtawpin an inel a, hnehna changin India ram champion an ni thei hi a ropui a, Mizoram hming an titha em em a ni" a ti. SYS Secretary chuan, "Nasa takin Mizoramin infiamnaah hma kan sawn a, infiamna hmun hma kan neihte tunah chuan state dangte hmaah pawh zahpuiawm lo kan nei nual tawh. Tun hnaiah India ram pum huap Table Tennis inelna leh All India Civil Service Badminton tournament-te kan thleng a, player lokalten kan hmunhma an fakin sawisel tur an hre tawh mang lo a ni. Kan infiammite hmasawnna hmuh theihin a thang mek a, tumruhna nei chungin sang zawk thleng tura kan inbuatsaih zel a ngai a ni" a ti.

Khelo India Mizoram football team lawmpuina hun hi Pu C. Laltlanthanga, Secretary, MSSC chuan a kaihruai a, India ram pum huap inelna hi PYKKA tih a nih laiin Mizoram chu football-ah an champion tawh thu a sawi. He huna thusawitu dang Pu Lalnghinglova Hmar, Honorary Secretary, MFA chuan Sawrkar leh Association te inrelbawlna a dik phawt chuan Mizote hian talent tha tak kan neih vangin result tha tak tak kan nei thei reng dawn a ni a ti bawk.

Mizoram football team hi Contingent Leader K.Sangkhumi leh Coach Samuel Lalrinngheta, Bungkawn ten an hruai a, player te hnenah lawmpuina thilpek hlan an ni.

Mizoram team-te chu - 1. Alex K.Malsawmkima, Ramthar Veng, Aizawl; 2. K.Lalhruaizela, New Champhai; 3. Lalmuanawma, Republic Veng, Aizawl; 4. William Chunglianbika, Muanna Veng, Aizawl; 5. Ramdinfela Pachuau, Venghlui, Aizawl; 6. F. Malsawmzuala, New Champhai; 7. Lalremruata, Bethlehem Veng, Aizawl; 8. Vannunmawia, Hlimen, Aizawl; 9. Lalremruata, Bethlehem Veng, Aizawl; 10. Vanramnghaka, Kanan, Champhai; 11. Andria Piangsiammuana, Bethel, Champhai; 12. Micky Lalhmachhuana, New Champhai; 13. Lalruatfela, Durtlang, Aizawl; 14. Lalmalsawmtluanga, Republic Veng, Aizawl; 15. Laldinchhuaha Khiangte, Kahrawt, Champhai; 16. Jesse Lalmawizuala - Vengthlang, Champhai