Paihte Kut zinga Kut pawimawh tak Khuado chu vawiin khan Berawtlang Tourist Complex-ah hman a ni a, Environment & Forest Minister Pu H Rohluna’n khuallian niin a hmanpui. Ni khat awh Khuado Kut hi Tourism Department leh Mizoram Paihte Cultural Society (MPCS) tangkawp te an buatsaih a ni.
Pu H Rohluna chuan Tourism Department in Mizoram a khualzin hipluh nan Kut hrang hrang an buatsaih thin chu lawmawm tiin Kut hrang hrang hman avangin Mizo hnam inpumkhatna tha zawk a awm theih thu a sawi. Mizo hnam ziarang a hausa a tiin Mizo hnam hrang hrangte huikhawm a, inang khata in en a, tawng khat hman hian Mizo hnam chu hnam ropui leh hnam zahawm a ah din chhuah theih thu Minister chuan a sawi. Chi bil emaw tawng bil emaw a kal hian hnam inpumkhatna a dal thei a ni tiin a that loh thu Minister chuan a sawi bawk.
Minister chuan Sorkar-in Mizoram hmun kilkhawr a awm te a thlahthlam lo a ni tiin hmasawnna tha zawk a awm theih nan heng hmunah te pawh hmun dang ang bawkin hmasawnna hna a kalpui zel a ni a ti. Kut hmangtute duhsakna hlanin Pu Rohluna chuan Mizoram inpumkhatna leh Mizo chi hrang hrangte hnam khata a awm thei nan theihtawp chhuah zel turin kalkhawmte a chah bawk a ni.
He huna thusawitu dang Tourism Secretary Pi B Sairengpuii chuan Mizoram in national leh historical landmarks an tih ang ropui tak takte nei lo mahse, Mizoram hausakna – ramngaw; tlang leh lui mawi tak; sik leh sa nuam tak; Mizo hnam ziarang; Culture leh Tradition danglam tak leh boruak muanawm tak hnuaia chi hrang hrang te in lungrual taka len ho te hian khualzin a hip luh theih thu a sawi.
Khuado ah hian Paihte lam chi hrang hrang – Khuado Lam, Khawkhai Lam, Buhtuh Lam, Zangta Lam te Mizo Cultural Organization in Cheraw an entir bawk a. Paite in thuam, Paihte in leh Paihte ei siam hrang hrang te phochhuah a ni bawk.
Khuado hi Paihte hovin bul leh bal malsawmna an dawn avanga lawmthu sawina Kut niin mihringte harsatna leh vanduaina thlentu thlarau sual atanga inthen thianghlimna hun atana hman a ni bawk thin a, vawiin thleng pawhin Paihte ten urhsun takin an la hmang thin a ni.
Vawiina Kut hi Pu V L Robiaka MLA, AMC Vice Chairman Pu Zarzoliana, AMC Councillors thenkhat te leh MPCS hruaitute ten an hmanpui bawk a
