2497/2025-2026

Aizawl dated 3rd December 2025: Vawiin chhun khan Planning & Programme Implementation Committee Room, Treasury Square, Aizawlah Khuanglenga Sawhthing sawngbawlna hmun (Ginger Processing Unit) bun tura hmalakna kalpui dan thlirletna hun neih a ni a. Pu KC Lalmalsawmzauva, Adviser to Chief Minister (Handholding) chuan he thutkhawm hi kaihruaiin Special Investment Committee on Agriculture & Allied Sector (SICA&A) member-te leh Commerce & Industries, Land Revenue & Settlement, Agriculture & Farmers’ Welfare, PWD, PHE, Power & Electricity, I&PR leh Tourism Department aiawhte an tel a ni.

Sawrkar flagship Scheme Bana Kaih Scheme hnuaia kuthnathawktute thlai thar zinga thlai thenkhat lei leh hralh hna chu sawt zawka kalpui a nih theih nan Khuanglengah Sawhthing sawngbawlna hmun peih fel thui a pawimawh thu, thutkhawmnaah hian sawi a ni a. Kum 2026 February thla atangin Sawhthing lei chu kalpui leh hman tum a nih avangin Khuanglenga Ginger Processing Plant chu January 2026 chhungin inbun fel hman tura ruahmanna siam a ni. Thlirletna huna tarlan danin Khuangleng Sawhthing bunna hmun panna kawng metre 270 bawr vela thui sial, zauh leh thawmthat hnate, tui litre nuai 1 dahkhawlna siamte, khawl chi hrang hrang chawm zo tur Transformer dahte leh a hmunhma tha taka hung a nih theih nana hmachhawp la awmte en ho a ni a. Heng hmabak la awmte hi January 2026 ral hmaa peihfel hman beisei a nih thu thutkhawm ah hian tarlan a ni.

December ni 5 leh ni 6-a  Mizoram Agricultural Marketing Board (MAMB), Mission Organic Mizoram (MOM) leh International Fund for Agricultural Development (IFAD) te tangkawpin, Mizoram kuthnathawktute thlai thar pho chhuahna leh sumdawnpui tur zawnna hun, Buyer- Seller Meet buatsaih a nih tur thu he hunah hian sawi a ni a. Heng sumdawngte hian Mizoram tharchhuah thlai leh thei chi hrang hrang belhchianna hun tha an neih theih nan leh insumdawntawnna tha siam a nih ngei theih nan, hun kaihruaitu Pu KC Lalmalsawmzauva chuan kalkhawmte tan la turin a sawm bawk a ni.