2498/2025-2026

Saitual, the 3rd December, 2025: Mizoram Cycling Association buatsaih “Zote Toyota Mizoram Mountain Challenge,” Stage 2 chu tukin khan Pu Lallawmawma, Addl DC, Saitual chuan Tamdil Resort atangin a vai liam a, Tamdil Resort atang hian Saichal kawng hlui lamah tlanin Hliappui – Aiduzawl – Rabung – Murlen - Vaparah an kai ang a, Champhaiah Stage-2 an hlen dawn a ni.

Addl DC. Pu Lallawmawma chuan thu tawi sawiin Mizoram Mountain Challenge Stage 2 atan Tamdil Resort-Saitual District an rawn hmang chu lawmawm a tih thu sawiin Saitual tan mellung pawimawh tak a ni, a ti a, hmasawnna rahbi thar kaina a nih bakah thalaite cho chhuaktu ni se a duh thu sawiin an kal zelna turah a duhsakna a hlan nghal bawk.

Mizoram Mountain Challenge 2025 hi December ni 2-6 chhunga neih mek niin ni 5 chhung atan Stage 3 ah then a ni a, Tuirial Airfield atanga tanin Hmuifang Tourist Resort ah an tawp dawn a ni. Stage tina pakhatna (winner) te hian Rs 10,000/- an hlawh dawn a, Overall winners te hian Rs 1,20,000/ an hlawh dawn bawk a ni. Tuirial Airfield atanga a tawpna tur Hmuifang thleng hian 475 km an tlan dawn a ni.

He Mizoram Mountain Challenge 2025-ah hian Army adventure wing atangin mi 3, Himachal Pradesh atangin-1, Haryana atangin-1, Mizoram atangin mi -5 an tel a, an zingah hian India Cycling No 1 Khusiaman Gharti pawh a tel a ni.