4440/2024-2025
Dated Serchhip, the 25th February, 2025: March ni 7 atanga ni 9, 2025 chhungin Thenzawl ah Zoram pum huap Kohhran Hmeichhe Inkhawmpui Lian (Presbyterian) neih a ni dawn a. Mikhual tam tak kal khawm tura beisei a nih avangin tui lamah harsatna kan tawh loh nan chhungtin ten Tuizem a theih anga lian lo nei vek turin Sr EE PHE chuan mipuite a ngen.
PHE Department chuan tui sem kawngah theih tawp a chhuah dawn a. Chutihrual chuan Inkhawmpui laia chhungtin hnena nitin a tui sem erawh a theih dawn loh avangin mahni tan zel tho a ni tih hriain he an ngenna hi ngaihpawimawh theuh turin a ngen a. Inkhawmpui hma-a hman theih turin Hand Pump Tube well tha lo zawng zawng pawh siam that hman tum a nih thu Sr EE, PHE, Serchhip District chuan a tarlang.
