4441/2024-2025
Lunglei, 2025 Ramtuk thla ni 25: Vawiin khan Lunglei District Consultative Committee (DCC), District Level Review Committee (DLRC) leh District Level Security Committee (DLSC) chu Additional Deputy Commissioner Pi Rochuangkimi Khenglawt hovin Lunglei DC Conference Hall-ah an ṭhu khawm.
Pi Rochuangkimi Khenglawt chuan member-te lawmna thu sawiin, mipuite'n bank kal tlanga hamṭhatna scheme hrang hrang awmte chiang taka an hriat theih nan banker-te chu theih tawp chhuah tur leh sawrkar line department hrang hrangte nen pawh thawh hona ṭha tak neih zel tum turin a chah a ni.
He ṭhut khawmah hian Lead District Manager Pu R. Lalmalsawma, RBI Aizawla Manager & Lead District Officer Pu Lalrosiama leh NABARD Lungleia District Development Manager (DDM) Pi Chinngaihkim Phiamphu te bakah, bank hrang hrangte, line department-te leh Sub-Headquarters YMA ai awhte an tel a ni.
He hunah hian DCC meeting hmasa meeting minute chu pawm a ni a. Kum 2024 October aṭanga December thla (3rd Quarter, 2024-25) chhunga Lunglei District-a bank hrang hrangte hna thawh thlir let niin, hmachhawp an neih leh hmalak zui dan tur te sawi ho nghal a ni.
He hunah Pradhan Mantri Jeevan Jyoti Bima Yojana (PMJJBY) leh Pradhan Mantri Suraksha Bima Yojana (PMSBY) te thlir ho niin, he'ng scheme-ah te hian hma sawnna hmuh a nih thu tar lan a ni a. PMJJBY leh PMSBY bika ni 15.10.2024 - 15.01.2025 chhunga 3 months saturation campaign kalpuiah Lunglei District chhunga target khaw 113-ah khaw 113 tuam chhuah niin, PMJJBY-ah target 847-ah 1,424 (168.12%) leh PMSBY-ah target 909-ah 1,796 (197.58%) inziak lut an awm a. Lunglei District-ah 3rd Quarter 2024-25 chhungin bank-te'n Credit/Deposit Ratio 71.69% an nei tih tar lan a ni a. Lunglei District chhunga bank-te'n loan an pek chhuah dan tur Annual Credit Plan (ACP) ruahman aṭangin bank-te hian Priority Sector hnuaiah 60% leh Non-Priority Sector hnuaiah 110.25% loan an pe chhuak tawh a. Self Help Group 43 hnenah cheng nuai 85.5 loan pek chhuah niin, KCC hnuaiah crop loan cheng nuai 2,016.37, Animal Husbandary loan cheng nuai 1,295.85 leh Fishery loan cheng nuai 4.67 pek chhuah a nih bakah, mi 47 hnenah PMEGP loan cheng nuai 181.15 pek chhuah a ni bawk a. Bank hrang hrangte'n Financial Literacy Campaign vawi 33 an neih thu tar lan a ni bawk.
He ṭhut khawmah hian bank sum vawn himna (security) lam leh pawisa leng vel (currency management & remittance) chungchang sawi ho ni bawkin, bank zawng zawnga awm ngei ngei tur Security Guard, CCTV, Fire Extinguisher leh Security Alarm te chu ngaih pawimawh ni se, tih a ni bawk.
He hunah hian National Bank for Agriculture and Rural Development (NABARD), Mizoram Regional Office, Aizawl-in a buatsaih Lunglei District chhunga kum 2025-2026 chhunga agriculture kaihhnawih leh bank behchhana hma lak theihna tur ruahmanna, 'Potential Linked Credit Plan 2025-2026' chu Chairman Pi Rochuangkimi Khenglawt chuan a tlangzarh nghal a ni.
Attachment
- Loading attachment...
