Mizoram State Tobacco Control Society (MSTCS) chuan Aizawl District chhunga Kohhran pawl hrang hrang hruaitute tan vawiin khan I&PR Conference Hall-ah zuk leh hmuam chungchang zir hona a buatsaih a. He "Workshop for Church Leaders of Various Denominations on Tobacco Control" ah hian Kohhran hrang hrang hruaitute sawm an nih angin an kal tha hle.
He workshop-ah hian zuk leh hmuam lama Mizorama dinhmun te, zuk leh hmuam avanga natna thleng thei te leh a dona tura Kohhran mawhphurhna te zir ho a ni a. Pi Lal Riliani, President, ISTH (M) in Kohhran hruaitute mawhphurhna tih paper a present a. Mizo khawtlang nunah Kohhran hian huhang a nei lian em em a; zuk leh hmuam do kawngah pawh Kohhran ten tangruala ke an pen phawt chuan a sawt hle ang tih a sawi. Dr.Jane R.Ralte, State Nodal Officer cum Project Officer, MSTCS chuan Vaihlo khuahkhirhna dan leh he dan kenkawhna kawnga Kohhran tihturte a sawi bawk. Dr.Zoramthanga, Senior Specialist, Civil Hospital Aizawl chuan vaihloin mihring taksa-a hrisellohna hrang hrang a thlen dan chungchang a zirtir bawk. Hemi hnuah hian group work leh sawihona hun tha tak neih a ni.
