Mizoram Secondary School Games vawi 29-na chu vawiin khan Aizawl Sipai Lammualah hawn a ni ta.

Hawnna inkhawm hi chawhma dar 11 ah neih niin School Education Joint Director Pu F.  Lalhluna chu Chairman a ni a. Khuallian tura beisei Sports Minister Pu Zodintluanga chuan rokhawlhna   avanga hawnna inkhawm a tel theih tak loh avangin Chairman hian hawnna leh School Flag pawh parh hna a keng tlang a, Parade chibai a chhanglet nghal a ni. Sports Minister thuchah tawi chhiar chhuahna hun hman a ni bawk.

Pu Zodintluanga chuan kum kalta a School Games chhimtu school naupangte hmaa a lo puanchhuah tawh angin kumin School Games phaitualhnim phah chungah an hmang thei ta chu lawmawm a tih thu a sawi a. Infiamna hmanga inelna thianghlim bei tura lo kal School naupangte chu infiammi thinlung dik tak pu a, chak a awmdan  leh chak loh a awmdan thiam turin a chah a. Mizoramin infiamna lama hma a sawn theih nan theihtawp chhuaha sorkar in tan a lak thu tarlangin School Games pawh hi talent zawnna tha tak ni ngei se an duh thu a sawi a. An thil tum a hlawhtlin theih chuan nakin lawkah zirlai inkhel thiam ten lehkha zir bansan chuang lo a eizawnna ngelnghet an neih theihna turin School Games hi buatsaih  tum a ni, Minister chuan a ti.

Kumin Secondary School Games hi school naupang infiammi kalkhawm tam ber tum a ni a. District 8 atangin School naupang 747 leh zirtirtu 61 an kalkhawm a. Aizawl District atangin High School 31 an tel a, Champhai District atangin High School 22 , Kolasib District atangin High School 15, Serchhip District atangin High School 15, Lunglei District atangin High School 18 , Lawngtlai District atangin High School 8 , Saiha District atangin High School 11 leh Mamit District atangin High School 12 an tel a ni. 

Secondary School Games vawi 29-na hi ni 4 chhung neih tur a ni a. Zirtawpni, March ni 25-ah kharna inkhawm, Education Minister Pu Lalsawta hovin Lammualah neih a ni ang.