6th Mizoram Legislative Assembly Budget Session chu vawiin dar 10:30 khan tan a ni a, Session hian March ni 30 thleng a awh dawn a ni.
Vawiin Assembly hawnnaah Mizoram Governor Lt.Gen.(Rtd) M.M.Lakhera chuan thusawiin Mizoram sorkar hmalakna leh hlawhtlinna hrang hrangte a tarlang a, Mizoramah remna leh muanna boruak hnuaiah sorkar fel fai leh dik kenkawh tlat tum a ni, a ti. Mirethei leh mi harsa zualte chawikan nan sorkarin NLUP tanpuina sem hna a tan tawh a, hei hian Mizoram sum leh pai dinhmun pawh nasa takin a than tir ngei a beisei thu a sawi. Lo neih, buh leh thlai, ran vulh leh Industry hnuaiah sumdawnna tenau chi hrang hrangte ngai pawimawhin sorkar chuan heng lama eizawnna nghet siam duh te tan awlsam leh tha zawka an thawh zel theih nan ruahmanna a siam chho zel a ni, a ti bawk. Zirna leh kawng hrang hranga thalaite hamsawnna tur te, kawlphetha hnianghnar zawka neih dan tur te, kawngpui leh inbiakpawhna te, state puma tui thianghlim hnianghnar zawka sem theih dan tur te, ei leh barah pawh intodelh zawka state pum siam thei turin sorkarin chak takin hma a la mek zel a. Chhiah khawnna lamah pawh kum 2010-2011 chhungin 22.9%-in chhiah lakkhawm a pung a ni, a ti. Sorkar Laipuiin thingtlang mite tan scheme hrang hrang a neih te chu tha takin kalpui mek zel a ni a, mipuite hriselna lam pawh ngai pawimawha damdawi in leh a kaihhnawih hrang hrang tih changtlun lamah sorkarin nasa takin hma a la mek tih Governor hian a tarlang bawk. Mizoram leilung, thing leh mau chereu mek te venghima thingphun belh leh ram humhalh a, zinmite hip thei turin hmalak mek zel a ni, a ti bawk.
Kum kal ta chhunga Mizoramin hlawhtlinna leh chawimawina a hmuhna hrang hrang Governor hian a tarlang bawk a. Thing leh mau humhalh kawnga a thawh that avangin Indira Priyadarshani Vriksha Mitra (IVPM) Award 2010 chu Mizoram State hnenah lawmman pawisafai cheng nuai 5 nen hlan a ni a. October ni 3, 2010-a 19th Commonwealth Games New Delhi-a tannaah Mizo Cheraw entir a ni chu khawvel pum huapah Mizote hming ti thain hriat kan hlawh phah hle a ni, a ti. Aizawl Civil Hospital chu Sorkar Laipui atanga endik tuten ISO Certificate a pe a, hei hi hmarchhak bialah hmu awmchhun a ni a. Mizoram mamawh em em Regional Cancer Centre changtlung tak pawh Zemabawk-ah hawn a ni tawh a ni. Infiamna lamah pawh Mizo thalaiten hlawhtlinna an hmu zel a, sorkar pawhin tan la zelin kumin khan Assam Rifles Lammual chu hnim lem phahin hawn a ni tawh a, Thenzawl Hockey Ground-ah pawh phah tum a ni. Mizoram-in Industry Policy kimchang tak nei thuai turin tan la mek a. September, 2010 khan Directorate of Geology & Mineral Resources pawh hawn a ni bawk.
Governor's Address hian minute 24 chhung a awh a. MLA Pu John Siamkunga'n Motion of Thanks a put luh chu lungrual takin pawm a ni bawk. MLA 3 - Pu Zodintluanga, PU K.S.Thanga leh Brig.T.Sailo - te chu rokhawlhna avangin vawiin Assembly hawnnaah an tel ve thei lo a ni. Vawiin Budget Sessiona hawnna hi dar 11:01 ah Speaker-in a ti tawp.
