A hmasain 'Khawvel Puma Tui Pawimawhna Ni' (World Water Day) pualin Mizoram mipuite duhsakna chibai ka buk a che u.

Kum 1992 -a Brazil khawpui Rio-de-Janeiro a United Nations Conference on Environment & Development (UNCED) chuan tui thianghlim pawimawh zia leh mihringten phang lova tui tlan tur kan neih theih reng a tul zia an sawi hova. Hemi denchhen hian tui pawimawhna 'Ni Bik' neih hial an duh thu an rel a ni. He an thurel hi a pawimawh em avangin United Nations General Assembly chuan bawhzui nghalin kum 1993, March 22 khan World Water Day hmasa ber chu a lo hmang tan ta a. Ram hrang hrangte chu an remchan anga he ni hi kum tin serha hmang turin UN chuan a ngen a. Tichuan, kum 1993 atang khan kum tin he Ni hi khawvel pum huapin hman a lo ni ta ziah a ni.

Kum tinin tui pawimawhna pho chhuak thei tur thupui thlanchhuah thin a ni a. Kum 2011 World Water Day thupui atan chuan 'Water for Cities : responding to the Urban Challenge' tih a ni a. Hei hi Mizo tawng chuan 'Khawpuia tui mamawh phuhru tura tan lak' tihna a ni thei mai awm e. Kumin World Water Day -in a tum ber chu - khawpuia mihring lo pung chak lutuk te, thilsiam chhuahna lo pung zel te, sik leh sa inthlak danglamin mirhing a nghawng dan te, innghirnghona leh chhiatna rapthlak lo thleng thin ten kan tui tlante a khawih thin dan mipuite hriattir hi a ni. He Ni hian sorkar, tlawmngai pawl, vantlang leh mitinten kan tui tlan tur chungchangah mawhphurhna la ve a, thawkho tur kan nihzia hriat thar tir tura beisei a ni.

Khawpuiah hian mihring an pung chak bik hle a, hei hian khawpui tui mamawhna a tizualkai nasa bik hle thin a ni. Tin, mihring kan changkan zawh poh leh kan tui hman pawh a lo tam zel a. Chuvang chuan kan thli pawh a lo tam phah zel bawk a ni. Kan changkan zawh poh leh kan bawlhhlawhte pawh kan hriselna atan a hlauhawm tual tual thin bawk a ni. Hetianga changkanna kawng kan zawh mek lai hian kan tui chhia, thli leh hnawmte mumal taka kan sawngbawl loh chuan chhiatna kan hmachhawn reng a ni tih hi kan hriat a tul tak zet a ni.

Tui hian tam lam a pan si lo, mithiamte chhut dan chuan kum 2025 a lo thlen meuh chuan khawvel ram hmun thuma thena hmun hnihte chuan tui harsatna namen lo kan tawk dawn niin an chhut. Chuvang chuan tui hna ti tlem zawnga chetlak loh leh kan neih sate renchem leh awmze neia hman kan zir zel a pawimawh hle a ni. Tin, ruahtuitlak tamna ram kan nih hre rengin ruahtui khawl hi thar thawh leh atan a va duhawm tak em ! A man a tlawm a, a enkawl a hautak si lo.

Ei leh in lama kan mamawh piah lamah tui thianghlim hi hriselna leh ram hmasawnna bul a ni a; chutih rual chuan tui bawlhhlawh erawh chuan tawrhna leh tlakranna min thlen thin a ni tih pawh hre thar leh ila a tha hle awm e.

Kumin World Water Day pual hian Zoram mipuiten kan tui tlan laite uluk taka enkawl a, kan tu leh fate thlenga hnianghnara kan neih theihna tura tan la a, thawhhona boruak tha siam zel turin ka sawm tak meuh che u a ni e.

Ka lawm e.