Vawiin khan Kolasib Project Vengah School Education Director Pi Esther Lalruatkimi'n District Education Office building a hawng.

Hawnna thu sawiin Pi Esther Lalruatkimi chuan, "sawrkar chhiahhlawh, (Govt. Servant) kan nih hi in hrethar leh in inpekna thar nen hna i thawk ang u, a ti. Chhiahhlawh chuan a ruaitu thuawihin a lakah a rinawm thin a, chutiang bawkin keini pawn rinawm takin sawrkar-ah intulut thar ila, tun hma zawng aia nasa in hna i thawk ang u, a ti. Education a thawkte chu naupangte vanga thawk kan ni a. Kan naupangte mi tam tak in kan theihnghilh nasa a, an hmakhua ngaia thawktu leh mi hmantlak chherchhuak thei tura kan thiamna pawh kan intuaithar nasat a ngai a ni a ti bawk. A sawi zelnaah Kolasib bul Thingdawl khua-ah Polytechnic zirna sawrkar-in sum engkim a neih tawh thu leb sum pawh PWD hnena hlan a nih tawh thu Pi Estheri chuan a sawi bawk a ni.

Pu B.Lianthlira, DEO, Kolasib in Building hawnna inkhawm hi a kaihruai a, Pu TMS Dawngliana, UDC chuan office sak a nih dan report a pe a, Kolasib DEO office hi kum 2002 ah hawn a ni a, office mumal neiloin SDEO office ah an inbun thin a, kum 2006-ah office thar sakna tur pawisa cheng 7,12,456/- an hmu a, kum 2008 April 28 ah tuna DEO nimek Pu B. Lianthlira'n charge a lak hnu lawkah office sak dan tur hi an ngaihtuah ta a ni. A tul ang ang thawk nghalin 5.4.2010 ah Directorate atangin Rs 5 lakhs an hmuh belh leh in tuna hawn theih tak hian sak a ni ta rih a ni. Building hi RCC a sak niin a dung 80ft. leh a vang 16ft. a zau a ni. Tunah hian ground floor peihfel hmasak a ni ta rih a, ruahman ang chuan sak zawh hunah vawiina hawn tak ground floor hi Garage atana la ruahman tur a ni, a chung chiah RMSA-in an luah anga a chhawng chung ber DEO office tura tih a ni. Sak chhunzawm zelna tura senso ngaihtuahsak tura Director an dilna chu Director chuan la ngaihtuah sak an nih tur thu he inkhawmah hian a sawi bawk.