No.7345/2020-2021

Tukin dar 8:00 AM khan DC Office tualzawlah sawm bikte nen Republic Day vawi 72-na lawmna hun hman a ni a, Deputy Commissioner Dr.H.Lalthlangliana chu khuallian niin Faina Hapta 2020 puala inelna kalpui lawmman semchhuahna hun neih a ni bawk.

Khuallian Dr.H.Lalthlangliana chuan India ramin a hranpaa inrelbawlna dan bu mumal leh felfai tak a neih theihna tura hruaitu hmasate hnathawh leh inpekna ropuizia sawiin hmathlir thui tak leh fing tak nen, khua leh tui zawng zawng kim tak a an tel theihna tur Dan an lo siam a, inthliarna awm hauh lovin kumtling tawhte hnenah ‘Right to Vote’ a pe bawk a ni a ti a. Mipuiten anmahni ngeia ram roreltu tur thlang thei dinhmuna an awm hi a hlutzia vawiin Republic Day-ah hian i hre thar leh ang u tiin Dr.H.Lalthlangliana chuan hrileng dona kawnga Kolasib district chhunga sawrkar hnathawkte, VLTF, Kohhran, Chanchinbumite leh tlawmngai pawl hrang hrangte thawhhonaah lawmthu a sawi bawk. District dangte aiin hna a hautak zawk chungin thawhhona tha tak avangin District pumah hrikai pung hluai a awm lo nia a hriat thu a sawi.

Khuallian chuan kum 2020-21 chhunga Kolasib district chhunga hri dona kawnga sawrkar hmalakna leh hmasawnna kawnga hmalakna kalpui hrang hrangte tarlanna hun hmangin Village Council 56-ah inthlanna hlawhtling tak neih a nih thu a sawi bawk a ni.  DC chuan ram danpuiin mitin chanvo intluktlanna a pek ang ngeiin hmasawnna hna thawhnaah leh khawtlang thatna tura hma laknaah mi tin len theihna ngaihtuah a, mi harsa leh hnuaihnung zawkte pawh rilru dam leh inthlahrung hauh lova an lo penchhuah ngamna tura hmalak thin a pawimawh hle a ni a ti.

Faina Hapta 2020 inelna-a Kolasib khawchhung Veng fai ber lawmman chu Electric Veng-in an la a, Govt. Chawngfianga Middle School chu school fai ber niin PHE Department Office chu office fai ber atan thlanchhuah a ni bawk. District Hospital, Kolasib chu Healthcare facility fai ber niin RC Restaurant, Diakkawn chu Restaurant fai ber atan thlan chhuah a ni a, Diakkawn Bazaar chu bazaar fai berah thlan a ni bawk. Mimal chawimawina dawngte chu Dr. Michelle C. Lallawmkimi, Senior Scientist & Head, KVK, Best Woman Scientist Award, Pi. VL Thanpuii, Pu. RK Lianzuala leh Pi. Rothanmawii, Best House Construction award under PMAY(U) 2019 te bakah hnathawh that avangin Pu.Vanlalruata, Leading Fireman hnenah Fire Service Medal for Meritorious Service hlan a ni. Executive Engineer, Kolasib WATSAN Division hnenah ODF Plus hnuaia hmalakna tha taka an kalpui avangin ‘Swachhata Award 2020’ an dawng bawk a ni.