No.7344/2020-2021

India ramin mahni puala danpui siama rorelna hran a neih  hriatrengna, India Republic Day vawi 72-na lawmna chu ram chhung hmun dangte rualin vawin khan Champhaiah neih a ni. Champhai district chhunga a lawmna pui ber chu tukin dar 8 khan DC Bungalow, Jericho Garden, Keifangtlangah neih a ni a. He hunah hian Champhai District Bawrhsap Pi Maria C.T. Zuali chu khuallian a ni a, hnam puanzar pawtpharha  zahna chibai bukin Police-te chibai bukna a chhanglet a ni. 

Bawrhsap Pi Maria C.T. Zuali chuan India ramin ramdang awpna hnuai atanga zalenna a hmuh hnua danpui neia mahnia ro inrel hran ram anih lawmna Republic Day pualin district mipuite, Covid-19 hripui beihletna kawnga thawktute leh ram venhim hna thawktute chibai a buk a. Champhai district chhunga sawrkar hnathawkte chu India danpui Article 36-51 hnuaia Directive Principles of the State Policy hre thar leh tura chahin, ram muanawm rorelna dik hnuaia mipuite eizawnna mumal pekte, intluktlanna awmtirte, hriselna ngaih pawimawhte, naupang zawng zawngte'n zirna tha an neih theihna tura tanlakte, retheite chawikan leh vantlang hriselna ngaih pawimawhte, loneih leh ranvulh  hlawk zawka kalpui leh leilung leh nungchate humhalh leh venhim tum tlatte, pipute sulhnu humhalh kawngahte tanla thar turin a sawm a. India ram ropui  tak hnam  leh tawng hrang hrang awmnaa mipui rorelna hlawhtling taka kalpui ani thei leh Constitution of India vawiin thlenga nung taka kalpui ani chu thil ropui leh chhinchhiahtlak tak a ni, a ti a. Mipuite chu inpumkhatna leh inthurualna ngaipawimawh tur leh sual do kawnga tangrual thiam turin a chah a ni. 

Republic Day-ah Champhai district atanga chhuak sipaite hriat reng an nih thu sawiin, kumin Army Day January Ni 15 a hman tak puala  ram leh hnam tana mi huaisen chawimawina semchhuak tak zinga  Subedar K.Laldingliana, Kahrawt Veng-a tel ve leh India sipai chawimawina sang Sena Medal a dawng chu chhuanawm a tih thu a sawi a. Kum kalta 2020 kum chhungin Champhai District-in lirnghing tum engemawzah a tuar thute, vanduaina avangin in leh lo chhia tam tak a awm thute sawiin, vanduaina tuarte tanpui leh chhawmdawl kawngah sawrkarin theihtawp a chhuah thu leh harsatna tawkte hnenah tanpuina sum leh mamawh tur hmanruate pek an ni, a ti a. Lirnghing natna hmun Zone 5 a awm Mizorama Lir a nghing  fo chuan insak dan kawngah  leh insakna hmun tur ram thlan kawngahte  fimkhur a tulzia min hriat thar tir se, nakin zela kan him tlan nan a tangkai thei dawn a ni, a ti bawk. 

Sawrkar hnathawk fawng pawimawh tak chelhtute chu inpekna thar nen ram leh hnam tana rawngbawl ngai pawimawh ber thin tura chahin, Champhai mipuite entawn ni tur leh kawng dik kawhhmuhtu nih tum fo turin a chah a. Hlawh lak nan maia thawk lova mipui, ram leh Pathian rawngbawlna ani tih hriaa mahni department enkawlte hma sawn pui tura theihtawp chhuaha miretheite thleng phak tura siam tum tura tanlak nise a duhawm hle ang, a ti a.  Champhai district chu leilung mawina leh hlutna ngah tak anih thu leh haichhuah thiam a pawimawh dawn thu sawiin, Champhai district mawina leh pi leh pute hmun hluite chu neitu thinlung pu a humhalhna chang hriat a tul thu a sawi bawk a. Intodelhna tham Leilet leh Phaizawl thahnem takte chu tangkai zawka hman anih theihna tura tanlak a tul thu pawh sawiin, mipuite chu  state leh ram dangte kuta innghat mai lo tur leh  eizawnna nghet leh rintlak, sawrkar pawmpui ngei nei tura taimakna leh tumruhna nunpui tlat turin a chah bawk. 

Republic Day 2021 lawmna hunah hian Champhai khawpui chhunga fai inelna Swachh Survekshan 2020 neih zawh taka titha thlanchhuah hrang hrangte hnenah Bawrhsapin chawimawina thuziak leh pawisafai a hlan nghal bawk a ni.

Veng fai inelna huangah Kahrawt pakhatna an ni a, Kanan-in dawtin Zote chu pathumna an ni a. Sikul fai berah Govt. R. Hranga High School, Kanan thlan niin, Presbyterian English School, Zotlang leh Govt Primary SchooI-I, Kahrawt te’n an dawt ve leh a. Sawrkar Office fai berah Superintendent of Police Office, Champhai chu thlan a ni a, Deputy Commissioner Office, Champhai chu pahnihna niin, Sub-Divisional Officer, Champhai Power Sub-Division Office chuan pathumna a hauh a ni. 

District Hospital Champhai chu Hospital fai ber atan thlan niin, Med Aim Hospital, New Champhai leh DM Hospital, Vengthlang te’n an dawt a. Hotel fai berah Hotel Chawngthu, Vengthlang thlan niin, Hotel Hranga Plaza Vengthlang chu pahnihna a ni. Restaurant fai inelnaah Gilgal Restaurant, Venglai chuan pakhatna a hauha, Jedidia Restaurant, Vengthlang chu pahnihnan niin, BSP Restaurant, Vengthlang chu pathumna a ni. Bazarpui, Rahsi veng chu Bazar fai ber atan thlan a ni a, Bethel Bazar leh Kanan Veng Bazar te’n an dawt a ni.