Transport Minister Pu P.C.Zoramsangliana chuan nimin khan Kolasib-a Deptt. zawng zawng hotute chu D.C. Conference Hall-ah a kawm a. Department tinten an harsatna an thlente chu chhinchhiahin a theih chin chinah sutkianpui Minister hian a tiam a ni.

 

He hunah hian thuhma sawiin Minister chuan, inthlan dawna an thutiam, Manifesto chu a mal mala tih hlawhtlin ngei a nih theih nan department officer te chu thawh ho puiah a sawm a. An sawrkar ngaih pawimawh ber tur chu mirethei te an ni, a ti a. Sawrkar hnathawkte chu sawrkar laka rinawm tlat turin a chah a ni.

Nimin vek tlailam khan D.C. Office chamber-ah Kolasib District chhunga chanchinbu mite Pu P.C.Zoramsangliana hian a kawm a. Thu sawiin, kawng tinrengah an sawrkar chu tawiawm turin Press mite a sawm a. Dil sak tu MLA mai nilo, a haichhuak theitu Kolasib bial hian a mamawh tawh a ni, tiin bial mipuiten an thlan tlin avanga a lawmthu a sawi a. Kawng tinrengah Kolasib chu chei a, thuam a tum dawn thu pawh a sawi a ni. Kolasib khaw chhunga ram awl zau tha hmuh a nih veleh Auditorium tha tak sa turin sawrkar a inkau reng a ni, Minister chuan a ti a. Press miten kawngpui chhia chungchang an tarlan NH 54 leh NH 154 tepawh naktip maia Delhi-a Central Ministry-a a thlen dawn thu a sawi a. Kolasib-Silchar Bus Service pawh a thara thlak vat a nih tur thu Press mite hi a hrilh a ni. Kolasib Hospital chungchanga zawhna chhangin Minister chuan kan Chief Minister in a sawi tawh a, Civil Hospital anga enkawl chhoh a ni ang, a ti bawk a ni.

Nimin chawhma lam khan Horticulture Department buatsaih Flower Show, Shopping Centre, Diakkawn a neih chu Minister hian a hawng bawk a ni.