Vawiin khan Environment & Forest Deptt. Officer-te chuan Meeting leh Training pawimawh tak an nei a. He meeting leh training hi Pu H. Rohluna, Minister, Environment & Forests Deptt., Mizoram chuan a hmanpui a,  Pu R.C. Thanga, PCCF leh Secretary, E & F in a kaihruai a ni. Training hi National Afforestation & Eco-development Board, Ministry of Environment & Forests, Govt. of India bultum a ni a, training thupui chu ‘Policies, Guidelines and Priorities of NAEB’ tih a ni.

 

Pu H. Rohluna chuan meeting leh training hawnna thu sawiin Department khaipa zawng zawng nena an hnathawh dante inhriattawnna tur leh an project kalpui mek zinga lian ber, National Afforestation Programme chungchanga training-na hun buatsaih a nih avanga a lawmthu a sawi. Minister chuan Department zahawmna leh hlawhtlinna bulpui ber chu tanrualna a ni tiin Department-a thawktu zawng zawngte hi chhungkua kan nih avangin chhungkua-in hma a sawn theihna tur chuan tanrual a tulzia a sawi a. Chu chu department tihmelmawi a, tizahawmtu a nih tur thu leh a bik takin Officer level-ah tanrualna a pawimawh zia a sawi bawk.

Minister chuan sorkar tharin a ngaih pawimawh em em chu tanrualna te, dikna leh rinawmna hi a ni a ti a. Hun kalta lama scheme hrang hrang hnuaia he department hmalaknate tha taka chhunzawmin  sorkar laipui atanga sum leh pai  hmuh anih theih nan scheme tharte siama tanlak a nih tur thu a sawi a. Rinawmna leh taimakna nen chung chu thawh a tul thu leh monitoring leh evaluation lam pawh tunhma aia chaka kalpui tur anih thu a sawi bawk.

Minister chuan he meeting leh training neih chhan ber NAP chungchang sawiin hei hi department hmalakna langsar ber anih thu leh mipuite ngheng taka thawktu ber pawh Forest Development Agency leh Village Forest Development Committee a ni a, kawng engkimah VFDC kaltlanga mipuite rawn a kalpui a ngaih thu a sawi. He programme kalpui danah in ennawn ngai an awm anih chuan an inennawn nghal a tul thu leh leh scheme in a tum tak hlenchhuak ngei tura tanlak anih tur thu officer kalkhawmte chu a hriattir a ni.

Minister chuan Department-in harsatna a tawh thin - Reserved Forests chhunga Land Pass pek leh encroachment chungchang chu Revenue Department te nen sawi hova chinfel hna thawh a tul thu a sawi a. Plantation kan siam emaw, nungcha humhalh hna kan thawk emaw, kan mawhphurhna theuh hi neitu nihna nen thahnemngai taka kan hlen theuh chuan Department ramte hian mite zah a hlawh ang a, heng harsatnate pawh hi a nep telh telh a rin thu a sawi a ni.

Minister chuan Forest Department inrelbawl feltak, kalphung feltak nei, dan leh dun hrang hrang fel tak hnuaia hnathawk thin a nih avangin thawktute tawiawmna zarah a mawhphurhnate tluang taka a hlenchhuah ngei a beisei thu a sawi a ni.

He meeting-cum-training hi nihnih awh tur a ni a, Regional Centre, NAEB, Ministry of E & F, Govt. of India atangin Professor B.K.Tiwari chuan lecture a pe a. Ramngaw siam leh enkawl hna programme pui ber NAP hnuaia FDA leh leh VFDC te hmalakna DFO ten an entir theuh bawk a ni. State pum atangin Conservator of Forests, DFO/DCF, ACF leh Autonomous District Council pathum atanga Forest Department hotute an tel kim hle.