No.3886/2020-2021

Vawiin khan I&PR Conference Hall Kolasib ah Kolasib District a Village Council inthlanna lo awm tura Returning Officer leh Village Level Officer-te tan Training buatsaih a ni a, Dr. H. Lalthlangliana, District Election Officer chuan Training hawnna hun hi hmanpuiin Pu C. Khamluaia, Election Officer in he hun hi a kaihruai a ni.

Dr. H. Lalthlangliana chuan Training hawnna hunah hian thu sawiin Village Council a inthlanna a chanvo neite chuan an hnate chu phurrit a ngai lo turin leh khawtlang hruaitu tur mi tha kan ngaihte thlanchhuahna hun tur a nih angin, phur tak leh rilru zangkhai tak, fimkhur tak chung si a kalpui turin a chah. Returning Officer leh Village Level Officer-te chu an mahni bial theuhah mawhphurhna pawimawh tak chelhtu an nih angin sawrkar buatsaih inthlanna Dan bu te chu chhiar tam tur leh zir tam turin a chah a, Presiding Officer leh Polling Officer-te rawntlak turin leh tha taka kaihhruai theitu ni turin vawiin Training-na hun hi hmang tangkai turin a chah a ni. Dr. H. Lalthlangliana chuan inthlanna chu inthlanna langtlang leh dik thei ang bera kalpui tur a nih thu sawiin, “Inthlanna a pawimawh ber chu a lang Fair tur a ni a, a Fair tur a ni bawk a ni” a ti.

Vawiin Training-naah hian Returning Officer 56 leh Village Level Officer 56 an tel a, Pu Nieng Thianlala, BDO Bilkhawthlir in Nomination File dan leh Vote chhiar dan chungchangah Training a pe a ni. Kolasib District a Village Council inthlanna lo awm turah hian Polling Station 56 buatsaih a ni a, Vote nei 60,634 awm in mipa 29,435 leh hmeichhia 31,199 an awm a ni.