No.3885/2020-2021

Dated Serchhip, the 7th August, 2020: Vawiin hian Serchhip DC Meeting Hall ah Serchhip District chhunga Political Party hrang hrang aiawhte, NGOs Coordination Committee aiawh te, MJA leh MPF aiawhte tan VC Inthlan lo awm tura Model Code of Conduct chungchang inhrilhhriatna hun buatsaih a ni.

He hun kaihruaitu Pu Kumar Abhishek, IAS, District Election Officer chuan, inthlanna thianghlim leh felfai tak a awm theih nana thawhpuiah kalkhawmte chu sawmin, inthlanna dan awmte leh hripui leng meka kan himna tura dan awm te zawm chunga engkim kan tih a tul thu a tarlang a. Tun hma atang tawhin Mizoram chu inthlanna boruak muanawm a neih thin vangin a hmingtha thin a, chu hmingthatna chu chhawm nung zel tura kan inbuatsaih a tul a ni, tiin a chah a ni. MPF, NGOs leh MJA te pawh hun hmasa lama sawrkar an thawhpuina tha tak te chhunzawm zel turin a ngen bawk. Chairman hian VC inthlanna atana Commission hunbi ruat te sawifiahna a nei a. Ni 11.8.2020 tlai dar 3:00pm thleng Nomination a file theih a, scrutiny neih zui tur a ni a. Inhnukdawk duh tan ni 13.8.2020 tlai dar 3:00pm thleng hun hawn a ni a, chu chu Symbol semin a zui ang a, ni 14.8.2020 chawhmaah Candidate a pawmte list chu State Election Commission ah thehlut vek tawh tur a ni. Ni 17.8.2020 zing dar 7 atanga tlai dar 5 inkarah vote thlak tur a ni a, vote chhiar zui nghal tur a ni ang. Inthlan that ngai a nih chuan a tuk ni 28.8.2020 ah vote thlak that zui leh nghal tur a ni. Thlan tharte chuan ni 4.9.2020 hmain VC body (Executive Body) an din fel vek tur a ni a, ni 7.9.2020 ah chuan VC inthlanna thil reng reng zawh fel vek tawh tur a ni ang. Pu Kumar Abhishek chuan, hriat chian loh leh zawh duh an neih apiang District Election Office ah zawt thin turin a chah a, tanpui turin an inpeih reng tih a hrilh a ni.

He hunah hian Pu Vanlalhmachhuana, Asst. District Election Officer chuan Village Council inthlan chhunga hman tur Model Code of Conduct sawifiahna a nei a, Model Code of Conduct bu hi kalkhawmte hnenah sem vek a ni. Sawifiahna a neih hnua Serchhip District MCC Team leader Pu Malsawmtluanga, PD, DRDA in pawimawh nia a hriatte sawifiahna a nei zui leh bawk a. Khawtinah insenso tlem leh boruak dai nuam taka inthlanna kalpui theih nia a hriat thusawiin, MCC dante zawm thaa, in umzui ngai lova hmala turin a ngen a ni.

Pu PC Laltanpuia, Addl. SP, Serchhip pawhin thusawina hun neiin Village Council inthlanna boruak nuam leh muanawm a awm theih nana thawhpuiah a sawm a. Vote thlak nia Social Distancing kengkawh tha tur leh Social Media hman dana fimkhur turtein a chah bawk.

Meetingah hian Serchhip District bikah MGNREGA hna, August thla chhunga thawh tur hi inthlan puan hmaa lo tihfel sa vek tawh, hna kal lai a nih avanga thawh chhunzawm a nih tur thu tarlan a ni bawk.

Kalkhawmte hian zawh duh an neih te zawhna leh sawihona hun neih zui a ni.

He hunah hian MCC Team Serchhip district member te, Pu R. Sathyiasundaram, IPS, SP, te, Pi C. Lalduhzuali, SDO, Sadar leh official pawimawh dangte an tel a ni.