No.3884/2020-2021

National Highway 306 siamthat hna thawh mek a kawng hawn hunbi siam avanga lirthei tangkhang khalhtu leh handyman-te, COVID-19 hri kai leh kai loh endik hna chu Kolasib DC ruahmanna in ngawrh taka kalpui a ni a. Tukin dar 9 thleng khan mi 320 endik tawh zingah mi 19 te chu COVID-19 hri kai an ni tih hmuhchhuah a ni a, natna langchhuak lo (asymptomatic) vek an ni.

Dr. H. Lalthlangliana Deputy Commissioner Kolasib chuan lirthei khalhtu tangkhangte Rapid Antigen Test hmanga endik kalpui chungchang ah sawrkar hmalaknate sawifiahin vawiin chhun khan Chanchinbumite a kawm a, ram pawn atanga bungraw phur lirthei lo lutte a khat tawk a endikna kalpui thin chu Mizoram mipuite kan him zawk nan an vai a Rapid Antigen Test neih tula a hriat thu a sawi a, kawng siam avanga lirthei innghakkhawm thin chu remchang a la in Screening Team ten nimin atang khan ngawrh taka endik hna an kalpui thu a sawi a ni. Tukin zing dar 9 thleng a Positive hmuhchhuah tharte hi CCC Polytechnic, Thingdawl ah khunghran nghal an ni a, an zinga mi 18 hi hnamdang mi lirthei khalhtu leh handyman te niin, Sethawn khawtual mi 1, naupang kum 12 a upa a tel ve bawk a ni. DC chuan heng Positive kaite hnaivai a khawsa Positive ve lo te pawh fimkhur thuhla ah enthlak tura a hranpa a dah an nih thu a sawi a, chutianga khunghran chu mi 22 an awm mek thu a sawi.

Pu Vanlalfaka Ralte SP Kolasib chuan Containment Zone chhungah mipuite him tlan nan leh lirthei khalhtute vil turin Police duty tura tirhchhuah an nih thu a sawi a, lirthei 572 endik hmabak an awm mek thu leh Mizoram chhunga lo luh tum Lailapur lamah lirthei 107 ding an awm thu a tarlang bawk a ni. Lirthei khalhtute leh an chuanpui endik tawh, result Negative-te chu tlan tlang tir zel an ni a, he thu buatsaih lai hian lirthei 89 Containment Zone atang hian chhuah an ni tawh a ni.

Dr. Lalhlimpuia CMO chuan Containment Zone ah hian nimin atang khan tlaivar a Screening Team pahnih (2) ten Rapid Antigen Test an kalpui thu a sawi a, a tul anga Test Kit-te pawh chah belh mek a nih thu leh ngawrh taka Test hi kalpui chhunzawm a nih thu a sawi bawk a ni.